प्लॅटफॉर्म एकवर सुविधांनी सज्ज
पुणे – रेल्वेमार्गासह गाडी आणि स्थानकावर जखमी झालेल्यांना तत्काळ वैद्यकीय उपचारासाठी पुणे रेल्वे स्टेशनवर आपत्कालीन वैद्यकीय सेवा कक्ष सुरू करण्यात आला आहे. प्लॅटफॉर्म क्रमांक एकवर सर्कुलटिंग परिसराजवळ (सिटी साइड) अत्याधुनिक सुविधांनी सज्ज असलेल्या कक्षाचे उद्‌घाटन रूबी हॉल क्‍लिनिकचे चेअरमन डॉ. पी. जी. ग्रांट यांच्या हस्ते करण्यात आले.
विभागीय रेल्वे व्यवस्थापक इंदू दुबे आणि अतिरिक्‍त विभागीय रेल्वे व्यवस्थापक बृजेश कुमार सिंह यांच्या मार्गदर्शनाखाली हा कक्ष सुरू करण्यात आला आहे. ट्रेनमधून पडणे किंवा अन्य वैद्यकीय आपत्तीत तत्काळ उपचार या कक्षातील डॉक्‍टरांच्या मदतीने देण्यात येईल. या कक्षामध्ये ईसीजी, डिफिब्रिलेटर, पुनरुत्थान सुविधा, नेब्युलायझर आदी सुविधा आहेत. तसेच स्वतंत्र मेडिकल असून आपत्कालीन परिस्थितीत लागणारी सर्व औषधे येथे उपलब्ध होतील.
सेवा कक्षातील सुविधा
* डॉक्‍टर, परिचारिका, कर्मचारी टीम 24 तास उपलब्ध
* प्राथमिक उपचार मोफत; अन्य नागरिकांसाठी शंभर रुपये तपासणी शुल्क
* आपत्कालीन स्थितीत तत्काळ रुग्णवाहिका सुविधा
* आपत्कालीन परिस्थितीत रेल्वेत जाऊनही तपासणी
* ईसीजी, डिफिब्रिलेटर, नेब्युलायझर आदी सुविधा
* स्वतंत्र औषधालयाची व्यवस्था
