Eknath Shinde : राज्यातील राजकारणात मोठी हालचाल घडताना दिसत असून उपमुख्यमंत्री एकनाथ शिंदे हे अचानक दिल्लीला रवाना झाले आहेत. त्यांच्या या अचानक दिल्ली दौऱ्यामुळे राजकीय वर्तुळात चर्चांना उधाण आले आहे. मिळालेल्या माहितीनुसार, या दौऱ्यात शिंदे भाजपचे अध्यक्ष नितीन नबीन तसेच केंद्रीय गृहमंत्री अमित शहा यांची भेट घेणार आहेत. राज्यातील काही जिल्हा परिषदांमध्ये शिवसेना शिंदे गटाला सत्तेपासून दूर ठेवले जात असल्याच्या तक्रारी स्थानिक नेत्यांकडून होत आहेत. त्यामुळे पक्षात नाराजीचे वातावरण निर्माण झाल्याची चर्चा आहे. विशेषतः रायगडमध्ये बहुमत असूनही तडजोड करावी लागली, तर फलटणमध्ये शिवसेनेला सत्तेत सहभागी करून घेण्यात आले नसल्याची खंत स्थानिक शिवसैनिकांनी व्यक्त केली आहे. या पार्श्वभूमीवर या प्रश्नावर तोडगा काढण्यासाठी शिंदे यांनी दिल्लीचा दौरा केल्याची माहिती सूत्रांकडून मिळत आहे. दरम्यान, नगर परिषद आणि नगर पंचायत निवडणुकांदरम्यान भाजपने अनेक ठिकाणी शिवसेना शिंदे गटाला धक्का दिला होता. त्या वेळी शिंदे गटातील काही पदाधिकाऱ्यांनी भाजपमध्ये प्रवेश केल्यामुळेही पक्षात नाराजी वाढली होती. त्यानंतर महापालिका निवडणुकीपूर्वीही शिंदे यांनी दिल्ली दौरा केला होता. त्या भेटीनंतर भाजप आणि शिवसेना शिंदे गटामध्ये अनेक ठिकाणी युती झाली आणि दोन्ही पक्षांनी एकमेकांच्या कार्यकर्त्यांना पक्षात प्रवेश देऊ नये, असा निर्णय घेतला होता. महापालिका निवडणुकांमध्ये दोन्ही पक्षांना चांगले यश मिळाले. काही ठिकाणी शिवसेना शिंदे गटाचा महापौर झाला, तर काही ठिकाणी भाजपचा महापौर झाला. त्यानंतर झालेल्या जिल्हा परिषद निवडणुकांमध्येही दोन्ही पक्षांनी एकत्रितपणे निवडणूक लढवली होती. मात्र, निकालानंतर काही ठिकाणी शिवसेना शिंदे गटाला सत्तेत सहभागी करून घेतले जात नसल्याचा आरोप होत आहे. या सर्व घडामोडींच्या पार्श्वभूमीवर शिंदे यांचा दिल्ली दौरा राजकीय दृष्ट्या महत्त्वाचा मानला जात आहे.