गुवाहाटी : आगरतळा-लोकमान्य टिळक टर्मिनल एक्स्प्रेसचे आठ डबे रुळावरून घसरल्‍याचा धक्कादायक प्रकार घडला आहे. आसाममधील दिमा हासाओ येथील दिबालाँग स्टेशनवर आज दुपारी 4 वाजताच्या सुमारास ही दुर्घटना घडली. या अपघातात सुदैवाने कोणतीही जीवितहानी झाली नाही. अपघाताची माहिती मिळताच रेल्वेचे वरिष्ठ अधिकारी, रेल्वे पोलीस तसेच आपत्ती व्यवस्थापन पथक घटनास्थळी दाखल झाले आहेत.
दरम्यान, या अपघाताच्या कारणांचा शोध घेत असल्याचे रेल्वेच्या अधिकाऱ्यांकडून सांगण्यात आले आहे. पीटीआयने दिलेल्‍या माहितीनुसार, आगरतळा-लोकमान्य टिळक टर्मिनल एक्स्प्रेस आज सकाळी आगरतळा येथून निघाली होती. ती दुपारी चारच्या सुमारास लुमडिंग-बर्दरपूर हिल भागात पोहोचली. याठिकाणी अचानक या इंजिनसह एक्सप्रेसचे आठ डबे रुळावरून घसरले. सुदैवाने गाडीचा वेग कमी असल्याने मोठी दुर्घटना टळली.
यासंदर्भात रेल्वे अधिकारी म्‍हणाले, आज दुपारी 4 वाजताच्या सुमारास दिबालाँग स्टेशनजवळ आगरतळा-लोकमान्य टिळक टर्मिनल एक्स्प्रेसचे आठ डबे रुळावरून घसरले. या अपघात कोणतीही जीवितहानी झालेली नाही. काही प्रवासी किरकोळ जखमी झाले आहेत. त्यांना रुग्णालयात दाखल करण्यात आले आहे. या अपघातानंतर लुमडिंग-बदरपूर सिंगल लाईन सेक्शनवरील गाड्यांची वाहतूक बंद करण्यात आहे. तसेच अपघात निवारण ट्रेन आणि अपघात निवारण वैद्यकीय गाडी घटनास्थळी दाखल झाले आहेत.
