वृत्तपत्रांवरील सेन्सॉरशिप सध्या उठणार नाही
नवी दिल्ली, दि. 4 – वृत्तपत्रांवरील सेन्सॉरशिप सध्या उठविणे शक्‍य नाही; परंतु सेन्सॉरशिपचा “उदारपणे’ अंमलबजावणी होण्याच्या दृष्टीने उपाय योजण्यात येतील, असे अभिवचन आज पंतप्रधान इंदिरा गांधी यांनी दिले. त्या म्हणाल्या, देशात फूट पडण्याच्या दृष्टीने वाटचाल करीत असलेल्या विदारक परिस्थितीला प्रतिबंध करण्यासाठी सेन्सॉरशिप जारी करणे भाग पडले.
सेन्सॉरशिप रद्द करावी
अ. भा. श्रमिक पत्रकार महासंघाच्या शिष्टमंडळाने पंतप्रधानांना एक निवेदन सादर केले, त्यात ही सेन्सॉरशिप रद्द करण्याची मागणी केली आहे. तसेच सेन्सॉरशिपचा गैरफायदा घेऊन अनेक वृत्तपत्र हे श्रमिक पत्रकारांना कामावरून कमी करीत आहेत.
अतिरिक्‍त पगारावरील सक्‍तीची बचत रद्द
नवी दिल्ली – अतिरिक्‍त पगारावरील सक्‍तीची बचत योजना 1 जुलैपासून रद्द करण्यात आल्याचे आज सरकारने जाहीर केले. मात्र अतिरिक्‍त महागाईभत्त्यावरील सक्‍तीची बचत योजना आणखी एक वर्ष चालू राहणार आहे.
शेतकरी वर्ग चिंतातूर
बारामती – या भागात पावसाचे अद्याप आगमन न झाल्याने खरिपाची पिके करणे अवघड झाले आहे. आडसाली ऊसाबद्दल अद्याप निश्‍चित सरकारी धोरण न समजल्यामुळे मेहनत मशागत करावी की नाही या कोड्यात शेतकरी वर्ग पडला आहे. एकतर निसर्गाची नाराजी व दुसरीकडे सरकारी अनिश्‍चत धोरणाची टांगती तलवार यामुळे या भागातील शेतकरी चिंतातूर झालेला आहे असे दिसते.
