राजकोट : गुजरातमधील शेल (बनावट) कंपनी प्रकरणात ईडीची एन्ट्री झाली आहे. गुजरातमधील काही कंपन्यांनी देशभरात २०० बनावट कंपन्या उघडून हजारो कोटी रुपयांचा कर चुकवल्याचे अहमदाबाद गुन्हे शाखेच्या तपासात उघड झाले आहे. या प्रकरणी आज ईडीने अहमदाबाद, भावनगर, जुनागढ, वेरावळ, राजकोट, सुरत आणि कोडिनारमध्ये 23 ठिकाणी छापे टाकले.
यापूर्वी सोमवारी अहमदाबाद गुन्हे शाखेने अहमदाबाद, जुनागढ, सुरत, खेडा आणि भावनगरमध्ये 14 ठिकाणी छापे टाकले होते. कारवाई दरम्यान, एकूण 12 बनावट कंपन्या तयार करणाऱ्या 33 हून अधिक व्यवस्थापकांना ताब्यात घेण्यात आले. सौराष्ट्रचे भाजप आमदार भगवान बरड यांचा मुलगा अजय बरड याचीही चौकशी करण्यात आली आहे.
वस्तू आणि सेवा कर गुप्तचर महासंचालक यांच्याकडून मिळालेल्या माहितीच्या आधारे अहमदाबाद गुन्हे शाखेने हा छापा टाकला आहे. या प्रकरणी गुन्हे शाखेचे एसीपी भरत पटेल म्हणाले की, देशभरात २०० हून अधिक बनावट कंपन्या व संस्था बनावट इनपुट टॅक्स क्रेडिट मिळवून आणि पास करून सरकारी तिजोरीचे नुकसान करण्यासाठी संघटित पद्धतीने काम करत आहेत.
अशा कंपन्या तयार करण्यासाठी बनावट ओळख आणि कागदपत्रे वापरणे यासारख्या फसव्या पद्धतीही समोर आल्या आहेत. खोट्या विधानांद्वारे कोट्यवधी रुपयांच्या कराचे नुकसान करून देशाचे आर्थिक नुकसान करण्याचा गुन्हेगारी कट रचत आहे. याप्रकरणी पत्रकार महेश लांगा याला बनावट कागदपत्रांच्या आरोपाखाली अटक करण्यात आली आहे. गुन्हे शाखा सर्व कागदपत्रे ताब्यात घेऊन पुढील कारवाई करत आहे. या छाप्यात गुन्हे शाखा, ईओडब्ल्यू आणि एसओजीच्या पथकांचाही सहभाग आहे.
डीजीजीआयचे संचालक हिमांशू जोशी यांनी अहमदाबादच्या ध्रुवी एंटरप्रायझेसच्या नावाने बनावट कंपनीची नोंदणी करून बनावट इनपुट टॅक्स क्रेडिट दिले जात असल्याची तक्रार अहमदाबाद गुन्हे शाखेकडे केली आहे. कर घोटाळ्यात सहभागी असलेल्या लोकांनी देशभरात २०० हून अधिक बनावट कंपन्यांची नोंदणी करून हजारो कोटी रुपयांचे बनावट इनपुट टॅक्स क्रेडिट मिळवले आहे.
करचोरी शोधण्यासाठी राज्यव्यापी छापेमारी
या तक्रारीच्या आधारे अहमदाबाद गुन्हे शाखा, एसओजी आणि इओडब्ल्यु विभागाने करचोरी शोधण्यासाठी राज्यव्यापी छापे टाकले. प्राथमिक तपासातच २०० कोटींहून अधिक रुपयांचा घोटाळा झाल्याची माहिती समोर आली आहे. तपासाची व्याप्ती वाढल्याने या घोटाळ्यांचा आकडाही वाढण्याची शक्यता आहे. शेवटची काही प्रकरणे जोडली तर सध्या एकट्या गुजरातमध्ये जीएसटी बनावट बिलिंग घोटाळ्याचा आकडा ५० हजार कोटींच्या पुढे गेला आहे.
