पुणे – माथेरान हिलस्टेशनवर मुंबई आणि पुण्यातून मोठ्या प्रमाणात पर्यटक येतात. थंड हवेचे ठिकाण अशी माथेरानची ओळख आहे. तसेच याठिकाणी वाहनांना बंदी असल्याने विशेष ओळख आहे. हे ठिकाण 800 मीटर उंचीवर आहे. हिलस्टेशनवर खासगी वाहन आणि मिनी ट्रेनची व्यवस्था आहे. मात्र माथ्यावर फिरण्यासाठी पायी आणि घोड्यावरून प्रवास करावा लागतो. मात्र आता येथे ई-रिक्षा धावणार आहेत. त्यामुळे पर्यटकांची पायपीटीपासून मुक्तता होणार आहे. आजपासून सोमवार (दि. 5) या ई रिक्षा सेवेचा प्रारंभ झाला आहे. भविष्यात माथेरानच्या पर्यटन वाढीमध्ये ई रिक्षाची भूमिका महत्त्वाची ठरणार आहे.
माथेरान बाबत अधिक माहिती अशी की, या हिल स्टेशनचा ब्रिटिशांनी 1850 साली शोध लावला. तेव्हापासून येथील पर्यावरणाचं नुकसान होऊ नये या हेतूने माथेरानमध्ये वाहनबंदी लागू करण्यात आली आहे. त्यामुळे पर्यटकांना दस्तुरी पॉईंटच्या वाहन तळावर गाड्या लावून पुढे माथेरान गिरीस्थानापर्यंतचा तीन किलोमीटरचा प्रवास हा घोडा किंवा हाताने ओढाव्या लागणाऱ्या रिक्षाने करावा लागत होता. नेरळ माथेरान वरून हिल स्टेशनवर जाण्यासाठी मिनी ट्रेन आहे. पर्यटकांना दस्तुरी पॉईंट ते माथेरान अशी तीन किलोमीटरची पायपीट करावी लागत होती. या सगळ्याचा माथेरानच्या पर्यटनाला मोठा फटका बसत होता. मात्र आता पर्यावरणपूरक ई-रिक्षाला परवानगी देण्यात आली आहे.
ही ई-रिक्षा फक्त महात्मा गांधी रस्त्यावरून धावणार आहे. प्रवेशद्वार दस्तुरीनाका, कम्युनिटी सेंटर, वाचनालय आणि बी. जे. रूग्णालयासमोर चार्जिंग स्टेशन उभारण्यात आले आहेत. या रिक्षातून प्रवास करण्यासाठी सुरुवातीला रेल्वेस्थानक आणि दस्तुरी नाका येथील तिकीट खिडकीवरच मिळणार आहे. सकाळी साडे सहा ते रात्री दहा वाजेपर्यंत ई-रिक्षाची सेवा पर्यटकांना मिळणार आहे.