राजगुरूनगर – खेड तालुक्‍यात प्राथमिक आरोग्य केंद्रात व ग्रामीण रुग्णालयात खोकल्याचे औषध आणि डायबेटीसच्या गोळ्यांचा तुटवडा असून रुग्णांची मोठी गैरसोय होत आहे. खासगी मेडिकलमधून नाइलाजाने जादा पैसे देऊन खोकल्याचे औषध खरेदी करावे लागत आहे.
खेड तालुक्‍यात सर्दी, खोकल्याची मोठ्या प्रमाणात साथ आहे. याबरोबरच डेंग्यू, मलेरियाची काही प्रमाणात साथ आहे. सर्वाधिक खोकल्याचे प्रमाण आहे. हवामानातील बदलामुळे खोकल्याच्या रुग्णाची संख्या जास्त आहे. त्यातच प्राथमिक आरोग्य केंद्रात आणि ग्रामीण रुग्णालयात खोकल्याणबर प्रभावी असणारे वेल्ड्रिल सिरप (Wadhryl Syrup) हे औषध मिळत नसल्याने सर्वसामान्य नागरिकांची मोठी गैरसोय होत आहे.
याबरोबरच तालुक्‍यात सरकारी दवाखान्यात डायबेटीसच्या टॅब मेटफॉर्मिन (tab Metformin) 500 एमजी या गोळ्यांचा तुटवडा आहे. तालुक्‍यात चाकण, आळंदी व चांडोली (राजगुरूनगर) ही तीन ग्रामीण रुग्णालये आहेत तर 10 प्राथमिक आरोग्य केंद्र 60 उपकेंद्रे आहेत. या सर्व आरोग्य केंद्र व ग्रामीण रुग्णालयात खोकल्याच्या औषधाचा व डायबेटीसच्या गोळ्यांचा तुटवडा असल्याने नागरिकांचे हाल होत आहेत.
खासगी मेडिकलमध्ये खोकल्याच्या औषधाची 100 मिलिच्या बाटलीला सर्वसामान्य कुटुंबाबातील रुग्णांना 100 रुपये मोजावे लागतात. हेच औषध सरकारी दवाखान्यात फुकट मिळत आहे. खोकल्याच्या औषधाचा तुटवडा भासल्याने खासगी मेडिकलमधून ते खरेदी करणे सर्वसामान्य रुग्णांना परवडत नाही, त्यामुळे खोकल्याने संसर्ग वाढण्याची भीती आहे. लहान मुलांना सर्वाधिक खोकला होत असतो त्यामुळे हे औषध सरकारी दवाखान्यात उपलब्ध होत नसल्याने रुग्णांना माघारी जावे लागते. तालुक्‍यात खोकल्याच्या रुग्णांच्या संख्येत वाढ होत आहे.
“चांडोली ग्रामीण रुग्णालयात खोकल्याच्या औषधाचा तुटवडा आहे. ग्रामीण रुग्णालयात ते उपलब्ध होत नसून प्राथमिक आरोग्य केंद्राकडून मागवत होतो; मात्र त्यांच्याकडे तुटवडा आहे. खोकल्याचे औषध आणण्यासाठी पुण्याला गाडी पाठवली होती; मात्र त्यांच्याकडून औषध उपलब्ध नसल्याचे कळविण्यात आले. खोकला सर्दीच्या रुग्णाची तालुक्‍यात संख्या जास्त आहे. हे औषध तत्परतेने उपलब्ध करण्यासाठी आमचे प्रयत्न आहेत. शासनाकडून पुढील काही दिवसांत ते उपलब्ध होईल.”
– डॉ. राजेंद्र गरड, वैद्यकीय अधीक्षक, चांडोली ग्रामीण रुग्णालय
