सोलापूर : सोलापुरातील सुप्रसिद्ध न्यूरो फिजिशियन डॉक्टर शिरीष वळसंगकर यांनी डोक्यात गोळी झाडून आत्महत्या केल्याची घटना घडली आहे. या घटनेने सोलापुरात मोठी खळबळ उडाली आहे. डॉक्टर शिरीष वळसंगकर हे सोलापुरातील ख्यातनाम डॉक्टर आहेत. गोळी झाडून घेतल्यानंतर त्यांना तातडीने वळसंगकर हॉस्पिटल येथे दाखल करण्यात आले. मात्र, उपचार सुरु असताना त्यांचा मृत्यू झाला.
दरम्यान, आत्महत्येपूर्वी डॉ. वळसंगकर यांनी एक चिठ्ठी लिहलेली होती, यामध्ये मनीषा मुसळे-माने हिच्यामुळेच टोकाचे पाऊल उचलत असल्याचा आरोप त्यांनी केला आहे. डॉ. वळसंगकर यांना आत्महत्येला प्रवृत्त केल्याप्रकरणी त्यांच्याच हॉस्पिटलमध्ये प्रशासकीय अधिकारी म्हणून काम करणाऱ्या मनीषा मुसळे-माने यांच्याविरुद्ध गुन्हा दाखल करण्यात आला आहे.
याबाबत मिळालेली माहिती अशी की, रात्री 10 वाजण्याच्या सुमारास पोलिसांनी या प्रकरणी गुन्हा दाखल केला असून रात्रीच न्यायालयाची परवानगी घेऊन आरोपी महिलेला अटक करण्यात आली आहे. या घटनेमुळे वैद्यकीय क्षेत्राला मोठा धक्का बसला आहे.
डॉ. शिरीष वळसंगकर हे अत्यंत प्रसिद्ध न्युरोसर्जन होते. केवळ सोलापूरच किंवा महाराष्ट्रचं नाही तर जगभरात त्यांनी विविध रुग्णालयात वैद्यकीय सेवा बजावली आहे. शहराच्या रामवाडी परिसरात असलेल्या वळसंगकर रुग्णालयाने अनेक मेंदूरोग रुग्णांना जीवनदान दिलं आहे. त्याच रुग्णालयाच्या डॉक्टरांनी टोकाचं पाऊल का उचललं आहे? याबाबत अद्याप माहिती समोर आली नाही.
