नगर – शहर सहकारी बँकेतील बोगस कर्जप्रकरणी एका गुन्ह्यात अटक करण्यात आलेल्या डॉ. नीलेश शेळके याला पोलिसांनी फसवणुकीच्या दुसर्या गुन्ह्यात वर्ग करून घेतले आहे. त्याला शुक्रवारी न्यायालयात हजर केले असता, न्यायालयाने 27 जानेवारीपर्यंत पोलीस कोठडीत ठेवण्याचा आदेश दिला आहे, अशी माहिती आर्थिक गुन्हे शाखेच्या पोलीस उपअधीक्षक प्रांजल सोनवणे यांनी दिली.
वैद्यकीय साधनसामग्रीसाठी शहर सहकारी बँकेतून बोगस कर्जप्रकरणे केल्याने डॉ. शेळके विरोधात कोतवाली पोलीस ठाण्यात फसवणुकीचे वेगवेगळे तीन गुन्हे दाखल आहेत. डॉ. रोहिणी सिनारे, डॉ. उज्ज्वला कवडे आणि डॉ. विनोद श्रीखंडे यांच्या फिर्यादीनुसार हे गुन्हे दाखल आहेत. या तिघा डॉक्टरांची प्रत्येकी पाच कोटी 75 लाख रुपयांची फसवणूक झाली आहे.
रेखा जरे हत्याकांडातील आरोपी बाळ बोठे याचा शोध घेत असताना डॉ. शेळके याला पोलिसांनी पुणे येथून ताब्यात घेतले होते. या गुन्ह्यात त्याची चौकशी झाल्यानंतर डॉ. सिनारे यांनी दाखल केलेल्या गुन्ह्यात डॉ. शेळके याला 26 डिसेंबर 2020 रोजी आर्थिक गुन्हे शाखेच्या पोलिसांनी अटक केली होती. डॉ. शेळके याला या गुन्ह्यात पोलीस कोठडीत होता.
त्यानंतर डॉ. शेळके याला काही दिवस क्वारन्टाईन करण्यात आले. पोलिसांनी आता डॉ. शेळके याला डॉ. कवडे यांच्या फिर्यादीनुसार दाखल असलेल्या गुन्ह्यात आर्थिक गुन्हे शाखा पोलिसांनी वर्ग करून घेतले. डॉ. शेळके याला आज पोलिसांनी न्यायालयात हजर केले होते. न्यायालयाने डॉ. शेळके याला 27 जानेवारीपर्यंत पोलीस कोठडीत ठेवण्याचा आदेश दिला.