डॉ. दत्ता कोहिनकर
खूप वर्षांपूर्वीची गोष्ट आहे. एक तरुण गावातील शेतकऱ्याच्या मुलीवर प्रेम करू लागला. तो तरुण त्या मुलीला भेटण्यासाठी वारंवार गावात येऊ लागला. हळूहळू ही गोष्ट त्या मुलीच्या वडिलांपर्यंत पोहोचली. त्या मुलीचे वडील खूप समंजस होते. त्यांनी ठरवलं की, या मुलाची योग्य पारख करून मुलीचं लग्न त्या मुलाशी करावं की नको याचा निर्णय घेऊ. त्यामुळे त्यांनी त्या मुलाला भेटायचं ठरवलं. दुसऱ्याच दिवशी हा तरुण शेतकऱ्याच्या घरी पोहोचला. शेतकऱ्याने त्याला विचारलं, तू माझ्या मुलीवर प्रेम करतोस? तरुण बोलला, हो करतो. तिच्याशी लग्न करायची इच्छा आहे? तरुण बोलला, हो. शेतकरी बोलला, मग तुला एक परीक्षा द्यावी लागेल. तरुण बोलला, मला याच्यासाठी काय करावे लागेल? शेतकरी बोलला, मी एक-एक करून तीन बैल मोकळे सोडून देईन. जर तू तीनपैकी एकाही बैलाची शेपटी पकडली तर तू या परीक्षेत पास होशील, जर तुला हे करता आलं नाही तर तुला परत जावं लागेल. शेतकरी त्या तरुणाला शेताकडे घेऊन गेला.
शेतकऱ्याने आधी एका बैलाला सोडले. त्या मोठ्या बैलाला पाहून तरुण घाबरून गेला. तरुणाने विचार केला, याची शेपटी पकडायला नको, दुसऱ्या बैलाची शेपटी पकडू. दुसरा बैल समोर आला तर तो आधीच्या बैलापेक्षा मोठा आणि शक्तिशाली होता. त्याची टोकदार शिंग बघून तो तरुण घाबरला आणि विचार केला की, यापेक्षा पहिला आलेला बैलच योग्य होता. पण संधी निघून गेली होती. आता तो तिसऱ्या बैलाची वाट बघू लागला तोपर्यंत तिसरा बैल बाहेर आला. तो बैल अगदी कमजोर होता. त्या तरुणाला आनंद झाला, पण बघतो तर काय, त्या बैलाला शेपूटच नव्हते. आता त्या तरुणाकडे कोणताच पर्याय उरला नाही. निराशेने तो तरुण गावातून निघून गेला आणि पुन्हा कधीच गावात परत आला नाही.
आपण नेहमीच चांगल्या संधीची वाट बघत आलेल्या संधीकडे दुर्लक्ष करतो. पण अशामुळे आपल्याकडे पश्चातापाशिवाय कोणताच पर्याय उरत नाही. अनेकदा चांगल्या संधीची वाट बघत समोरून आलेल्या संधी सोडून देतात. ज्याला ते चांगली संधी समजतात ती संधी नसते. म्हणून आलेल्या संधीचा लाभ घ्या. संधी कुठेही कशीही डोकावू शकते.
काही महिन्यांपूर्वी लांबचा प्रवास करून एका कार्यक्रमात एका दिग्गज नेत्याला भेटून त्याच्या स्टेजवरच पुस्तक प्रकाशित करण्याची संधी मला मिळाली. दिग्गज व्यक्ती असल्याने नियोजित कार्यक्रमातच त्यांनी पुरेसा वेळ न दिल्यामुळे माझं पुस्तक प्रकाशन समारंभ राहून गेला पण जाता जाता त्या व्यक्तीला व त्यांच्या सोबतच्या माजी मंत्र्याला मी पुस्तक भेट देण्याची संधी साधली. त्यांनी प्रवासात हे पुस्तक वाचलं व घरी पत्नीला दिले. त्यांच्या पत्नीला माझे पुस्तक एवढे आवडले की त्यांनी मला 5 हजार पुस्तकांची ऑर्डर दिली व व्याख्यानाला बोलावले. यातून मला खूप काही मिळाले. म्हणून संधी शोधा व ती साध्य करण्यासाठी पावले उचला. सतत जागरूक राहा. संधी कशी निर्माण होईल या विचारात राहा.