पॅरिस – सर्बियाचा जागतिक अग्रमानांकित टेनिसपटू नोवाक जोकोवीच याला व्हिसाच्या कागदपत्रात झालेल्या चुका तसेच करोना प्रतिबंधक लस न घेतल्याने ऑस्ट्रेलियन ओपन स्पर्धेला मुकावे लागले. आता फ्रान्स सरकारनेही त्याला इशारा दिला आहे. लस न घेतलेल्या कोणत्याही खेळाडूला फ्रेंच ओपन ग्रॅंडस्लॅम टेनिस स्पर्धेत सहभागी होता येणार नाही असे स्पष्ट केले आहे. त्यामुळे ऑस्ट्रेलियन ओपन स्पर्धेनंतर आता फ्रेंच ओपन स्पर्धेला मुकण्याची नामुष्की जोकोविचवर येऊ शकते.
फ्रान्सच्यासंसदेमध्ये करोना नियमावलीबाबत एक विधेयक नुकतेच मंजूर करण्यात आले. सार्वजनिक ठिकाणी फिरण्यासाठी लसीकरण पूर्ण झाल्याचे प्रमाणपत्र सोबत बाळगणे बंधनकारक करण्यात आले आहे. रेस्टोरंट, कॅफे, सिनेमा हॉल आणि ट्रेन प्रवासादरम्याने प्रत्येक व्यक्तीला करोना लस घेतल्याचा पुरावा दाखवावा लागणार आहे.करोनाच्यापार्श्वभूमीवरील कायदा सर्वांसाठी बंधनकारक आहे.
फ्रान्समध्ये भेट देण्यासाठी येणाऱ्या सामान्य व्यक्तीपासून ते व्यावसायिक खेळाडू आणि प्रसिद्ध व्यक्ती या सर्वांसाठी एकच नियम असेल, असे क्रीडामंत्रालयाने स्पष्ट केले आहे. फ्रेंच ओपन स्पर्धा मे महिन्यात आहे. तोपर्यंत परिस्थिती बदलूही शकते. पण सध्याच्या घडीला कोणत्याही खेळाडूला लसीकरणाच्या प्रकरणात सवलत दिली जाणार नाही असेही फ्रान्स सरकारने स्पष्ट केले आहे.
जोकोविचसह राफेल नदाल आणि रॉजर फेडररने संयुक्तरित्या 20 वेळा ग्रॅंडस्लॅम स्पर्धा जिंकली आहे. ऑस्ट्रेलियन ओपन स्पर्धेत 21 व्या ग्रॅंडस्लॅमला गवसणी घालून विश्वविक्रम प्रस्थापित करण्याची जोकोविचला संधी होती. पण करोना लस न घेतल्याने त्याची ही संधी लांबणीवर पडली आहे. यासाठी त्याला फ्रेंच ओपन स्पर्धेपर्यंत प्रतिक्षा करावी लागणार असल्याचे स्पष्ट झाले असताना आता इथेही त्याला अडथळे निर्माण होण्याची चित्र निर्माण झाले आहे.
