पिंपरी – आपल्या सुरेल आणि जादुई आवाजाने लहान-थोरांच्या मनावर अधिराज्य गाजविणाऱ्या बाल कलाकारांना ऐकण्याची संधी येत्या 26 ऑक्टोबर रोजी पिंपरी-चिंचवडकरांना मिळणार आहे. निमित्त आहे ते “दिवाळी पहाट अर्थात जल्लोष बालगोपाळांचा’ या कार्यक्रमाचे. “प्रभाती सूर नभी रंगती’ याची प्रचिती या कार्यक्रमातून रसिकांना निश्चितच येईल.
चिंचवड मधील प्रा. रामकृष्ण मोरे सभागृहात पहाटे साडे पाच वाजता हा कार्यक्रम होणार आहे. औद्योगिक नगरी अशी ओळख असलेल्या पिंपरी-चिंचवडमधून अनेक कलाकार उदयास येत आहेत तर उद्योगनगरीला सांस्कृतिक चेहरा देण्याचा प्रयत्न सामाजिक क्षेत्रातील धुरीण करीत आहेत. याच अनुषंगाने समर्थ प्रॉडक्शन आणि मातृमंदिर विश्वस्त संस्थेतर्फे या कार्यक्रमाचे आयोजन करण्यात आले असल्याची माहिती समर्थ प्रॉडक्शनच्या रमा पाटील यांनी दिली.
अभंग, भक्तिगीत त्याचप्रमाणे लोकप्रिय गीतांचा मिलाफ असलेल्या या कार्यक्रमात चैतन्य देवढे, अंशिका चोणकर, सोहम गोराणे, सई जोशी, अभिषेक कांबळे, अंजली गायकवाड, ऋचा पाटील आणि भारतरत्न भीमसेन जोशी यांचा नातू विराज श्रीनिवास जोशी यांचा सहभाग असणार आहे. कार्यक्रमाचे संगीत संयोजन शामजी गोराणे यांनी केले आहे. प्रकाशाचा उत्सव असलेल्या दिवाळीनिमित्त आयोजित केलेल्या बालकलाकारांच्या सुरेल मैफलीस रसिकांनी आवर्जून हजेरी लावून दिवाळीचा आनंद द्विगुणित करावा, असे आवाहन रमा पाटील यांनी केले आहे. हा कार्यक्रम रसिकांसाठी विनामूल्य खुला असल्याचे त्यांनी सांगितले.