पुणे – शौनक शिंदेने कुमार मुले व युवक गटात विजेतेपद पटकावित जिल्हा मानांकन टेबल टेनिस स्पर्धेत दुहेरी मुकूट मिळविला. ही स्पर्धा रेडियंट स्पोर्टस अकादमीतर्फे आयोजित करण्यात आली होती. पृथा वर्टीकरनेही दोन गटांमध्ये अजिंक्यपद घेतले.
सन्मित्र संघाच्या क्रीडा संकुलात झालेल्या या स्पर्धेतील युवक गटात शिंदेनेआदित्य जोरीचा 12-10, 12-10, 6-11, 1-7, 11-9 असा पराभव केला. त्याने टॉपस्पीन फटक्यांचा सुरेख खेळ केला. कुमारांच्या अंतिम लढतीत त्याने चिवट झुंजीनंतर आदर्श गोपाळचे आव्हान परतविले. हा सामना त्याने 5-11, 8-11, 11-6, 12-10, 11-7, 11-7 असा जिंकताना काउंटर ऍटॅक पद्धतीचा बहारदार खेळ केला. मुलांच्या 12 वर्षाखालील गटात प्रणव घोलकर विजेता ठरला. त्याने अंतिम फेरीत अग्रमानांकित अर्णव झगडे याच्यावर 11-6, 11-6, 12-10, 11-6 असा सनसनाटी विजय नोंदविला. त्याने परतीच्या फटक्यांचा सुरेख खेळ केला.
सबज्युनिअर गटाचे विजेतेपद अन्वय कोवेलमुडीने घेतले. त्याने अंतिम लढतीत नील मुळ्ये या अग्रमानांकित खेळाडूला पराभूत करीत आश्चर्यजनक विजय मिळविला. ही लढत त्याने 11-2, 11-5, 12-10, 11-8 अशी जिंकली. पुरूषांच्या एकेरीत अग्रमानांकित रजत कदमने विजेतेपदावर आपले नाव कोरले. त्याला अंतिम फेरीत सहाव्या मानांकित धनंजय बर्वेने कौतुकास्पद लढत दिली. अटीतटीने झालेला हा सामना कदमने 11-9, 11-8, 8-11, 4-11, 12-14, 11-6, 11-9 असा जिंकला.
मुलींमध्ये पृथाने 21 वर्षाखालील गटाच्या अंतिम फेरीत स्वप्नाली नरळेचा 11-3, 11-8, 11-8, 12-10 असा पराभव केला. तिने टॉपस्पीन फटक्यांचा सहजसुंदर खेळ करीत विजयश्री मिळविली. 15 वर्षाखालील गटाच्या अंतिम सामन्यात तिने धनश्री पवारला 11-9, 11-4, 11-9, 11-5 असे हरविले. ही स्पर्धा पुणे जिल्हा टेबल टेनिस संघटनेच्या मान्यतेने आयोजित करण्यात आली होती.
