Datta Meghe Passes Away : नागपूर येथे विदर्भातील ज्येष्ठ राजकारणी, शिक्षणतज्ज्ञ आणि माजी मंत्री दत्ता मेघे यांचे रविवारी (२२ मार्च) निधन झाले. ते ९० वर्षांचे होते. त्यांच्या निधनामुळे विदर्भासह राज्याच्या राजकीय, शैक्षणिक आणि सामाजिक क्षेत्रात मोठी पोकळी निर्माण झाली आहे. ११ नोव्हेंबर १९३६ रोजी वर्धा जिल्ह्यातील पवनार येथे जन्मलेल्या दत्ता मेघे यांनी आपल्या दीर्घ कारकिर्दीत काँग्रेस, राष्ट्रवादी काँग्रेस आणि भाजप या पक्षांमध्ये काम केले. ते चार वेळा लोकसभा खासदार म्हणून नागपूर, रामटेक आणि वर्धा मतदारसंघांचे प्रतिनिधित्व करत होते. तसेच त्यांनी राज्यसभा सदस्य आणि महाराष्ट्र विधानपरिषद सदस्य म्हणूनही महत्त्वपूर्ण जबाबदाऱ्या पार पाडल्या. राजकारणाबरोबरच त्यांनी शिक्षण आणि आरोग्य क्षेत्रातही मोठे योगदान दिले. ‘नागर युवक शिक्षण संस्था’ तसेच ‘दत्ता मेघे इन्स्टिट्यूट ऑफ मेडिकल सायन्सेस’सारख्या संस्थांच्या माध्यमातून ग्रामीण भागात शिक्षण व आरोग्य सुविधा पोहोचवण्यात त्यांचा मोलाचा वाटा होता. त्यांच्या कार्यामुळे विदर्भातील हजारो विद्यार्थ्यांना शिक्षणाची संधी उपलब्ध झाली. दत्ता मेघे हे स्वतंत्र विदर्भ राज्याच्या मागणीचेही समर्थक होते. त्यांच्या कुटुंबातील पुढील पिढीही राजकारणात सक्रिय असून त्यांचे पुत्र समीर मेघे सध्या आमदार आहेत. त्यांच्या निधनाची बातमी समजताच विविध राजकीय आणि सामाजिक क्षेत्रांतून शोक व्यक्त करण्यात येत आहे.