टीव्ही अभिनेता अक्षय वाघमारे याचा नुकताच साखरपुडा झाला. “डॅडी” या नावाने कुख्यात गॅंगस्टार अरुण गवळीची कन्या योगिता गवळीसोबत अक्षय विवाहबंधनात अडकणार आहे. जवळचे नातेवाईक आणि मित्र मंडळींच्या उपस्थितीत अक्षय-योगिताचा साखरपुडा झाला.
“मी योगिताला गेल्या पाच वर्षांपासून ओळखतो. आमच्या कुटुंबीयांनी आम्हाला विवाहबंधनात अडकण्याचा सल्ला दिला. त्यानंतर आम्ही लग्न करण्याचा निर्णय घेतला. आम्ही दोघेही आनंदी आहोत’ असे अक्षय वाघमारेने सांगितले.
तथापि, योगिता आणि अक्षय यांनी आपला विवाह म्हणजे अरेंज मॅरेज म्हणण्याऐवजी त्याला अरेंज लव्ह मॅरेज असे म्हणायला आवडेल, असे म्हटले आहे. योगिता आणि अक्षयच्या साखरपुडा समारंभाला अभिनेता क्षितीज दाते, मुग्धा परांजपे, विभावरी देशपांडे, हृषिकेश देशपांडे यासारख्या कलाकारांनी हजेरी लावली होती. योगिता आणि अक्षय फेब्रुवारी 2020 मध्ये विवाहबंधनात अडकणार आहेत. अक्षयने फत्तेशिकस्त, बेधडक, दोस्तीगिरी, बस स्टॉप यासारख्या मराठी चित्रपटांमध्ये भूमिका केल्या आहेत. नुकतीच ती फुलराणी या मालिकेतील त्याची भूमिका गाजली होती.