Crude Oil Purchase: मार्च महिन्यात भारताने रशियाकडून केलेली खनिज तेल खरेदी तीन पटीने वाढून 5.3 अब्ज युरो इतकी झाली आहे. आखातात संघर्ष वाढल्यानंतर अमेरिकेने भारताला रशियाकडून तेल खरेदी करण्यासाठी परवानगी दिल्यानंतर भारतातील खासगी आणि सरकारी तेल कंपन्यांनी रशियाकडून तेल खरेदी वाढविली. प्राप्त माहितीनुसार रशियाकडून तेल खरेदीत मार्च महिन्यात भारत चीननंतर दुसर्या क्रमांकावर होता. फेब्रुवारी महिन्यात रशियन क्रुड खरेदीत भारत तुर्कस्ताननंतर तिसर्या क्रमांकावर होता. मार्च महिन्यामध्ये तो दुसर्या क्रमांकावर गेला. अमेरिकेने भारताला रशियाकडून तेल खरेदी करण्याची परवानगी दिल्यानंतर जी रशियाची जहाजे समुद्रात होती ती भारताच्या दिशेने वळली आणि भारताने ही खरेदी केली. त्यामुळे या कालावधीत भारताच्या पेट्रोल आणि डिझेलच्या पुरवठ्यावर फारसा परिणाम झाला नाही. सरकारी तेल कंपन्यांनी मासिक पातळीवर रशियाकडून तेल खरेदी 148 टक्क्यानी वाढविली आहे. त्या तुलनेत खासगी कंपन्यांनी रशियाकडून कमी तेल खरेदी केली. मार्च महिन्यामध्ये रशियाच्या एकूण क्रुडपैकी चीनने 51 टक्के, भारताने 38 टक्के, तुर्कस्तान सहा टक्के तर युरोपियन समुदायाने दोन टक्के तेल खरेदी केले आहे. स्वतः युरोपियन समुदायाने रशियन तेलावर निर्बंध घातले असले तरी युरोपियन समुदायातील बहुतांश देशांनी या कालावधीत रशियातील तेल खरेदी केली असल्याचे सांगितले जाते. त्याचबरोबर भारतातून डिझेल आणि पेट्रोल खरेदी केली जाते. यामुळे भारत सरकारने इंधन निर्यातीवरील शुल्क वाढविले आहे.