पुणे – करोनाच्या “ओमिक्रोन’ व्हेरिएंटवर “कोविशिल्ड’ किती प्रभावी आहे, हे येत्या दोन-तीन आठवड्यांत समजणार आहे, अशी माहिती “सीरम इन्स्टिट्यूट ऑफ इंडिया’चे सीईओ अदर पूनावाला यांनी मंगळवारी सांगितले. “ओमिक्रोन’ किती घातक आहे, याविषयी आताच सांगता येणार नाही, असेही पूनावाला यावेळी म्हणाले.
“सध्या “ओमिक्रोन’ने जगातच भीतीचे वातावरण आहे, तर सध्याच्या करोना प्रतिबंधक लस या संसर्गावर प्रभावी आहे का, याविषयी जगभरात आणि विशेषतः भारतात तर्क-वितर्क लढवले जात आहेत. त्यामुळे याविषयी ऑक्सफोर्ड विद्यापीठाचे शास्त्रज्ञ संशोधन करत आहेत. ते या विषयातील निष्कर्षापर्यंत पोहोचले तर पुढील लसनिर्मिती करणे सोपे जाईल,’ असे पूनावाला म्हणाले.
बूस्टर डोसवरही भाष्य
सध्या बूस्टर डोसची चर्चा जगभरात होत आहे. त्याविषयी पूनावाला म्हणाले “बूस्टर डोस आपल्यापुढे पर्याय आहे. परंतु सध्या करोनावरील दोन डोस देण्यावर आणि देशातील लसीकरण पूर्ण करण्यावर सरकारचे लक्ष्य आहे. देशातील राज्य आणि केंद्रशासित प्रदेशांसाठी “सीरम’ने 25 कोटी डोस राखीव ठेवले आहेत.
बूस्टर डोस देण्याबाबत केंद्राने निर्णय घेतला, तर आम्ही लसीचा मुबलक साठा उपलब्ध करून देण्यास तयार आहोत. तज्ज्ञांच्या सल्ल्याने हा डोस घेता येऊ शकतो. तसेच त्याची किंमत 600 रुपये असेल.’
कोवोवॅक्स’ लसीचा मुबलक साठा आमच्याकडे आहे. करोनावरील ही स्वदेशी लस आहे. पुढील काही आठवड्यांत या लसीच्या वापराला परवानगी मिळणार आहे. जानेवारी-फेब्रुवारीपर्यंत ही लस भारतात उपलब्ध होईल.
– अदर पूनावाला, सीईओ, सीरम इन्स्टिट्यूट