पुणे – करोना या भयंकर विषाणूने जगभरात थैमान घातले असताना, भारतातही या आजाराचे रुग्ण आढळत आहेत. त्या पार्श्वभूमीवर पुणे जिल्हा प्रशासन, महापालिका आरोग्य विभागाने आपली यंत्रणा सज्ज ठेवली आहे. तर, दुसऱ्या बाजूला “सिरम इन्स्टिट्यूट’सारख्या संस्था या विषाणूवर “ऍन्टिबायोटिक’ शोधत असून लवकरच त्याची चाचणी केली जाणार आहे. तर, अशा परिस्थितीत काही व्यावसायिक या परिस्थितीत “हात धुवून घेत’ असून आवश्यक वैद्यकीय साहित्यांच्या किंमती दुपटीने वाढवण्यातआल्या आहेत. या सर्व पार्श्वभूमीवर दैनिक “प्रभात’ने घेतलेला हा आढावा.
शहरात प्रतिबंधात्मक औषध फवारणी आवश्यक
करोना विषाणूवर आतापर्यंत ठोस कोणतीही प्रतिबंधात्मक लस उपलब्ध नाही. संभाव्य खबरदारी म्हणून या आजाराला प्रतिबंधात्मक आळा घालण्यासाठी संपूर्ण शहरात औषध फवारणी करावी, अशी मागणी शिवसेनेचे शहर प्रमुख संजय मोरे यांनी केली आहे. त्यासाठी शहरातील प्रत्येक झोपडपट्टी, वस्ती, भाग, कॉलनी, सोसायट्यांमध्ये फवारणीची मागणी केली आहे. सध्या पुणे शहरात कचरा समस्याने उग्र रूप धारण केले आहे. त्यात, प्रदूषणामुळे सार्वजनिक आरोग्याला धोका निर्माण झाला आहे. अशा स्थितीत या आजाराला रोखण्यासाठी प्रतिबंधात्मक उपाय आवश्यक आहेत. ही बाब लक्षात घेऊन या बाबत तातडीने कारवाई करण्याची मागणी मोरे यांनी पालिका आयुक्तांना दिलेल्या पत्रात केली आहे.
जिल्ह्यात “करोना’चा एकही रुग्ण नाही : जिल्हाधिकारी
जिल्ह्यात “करोना’चा एकही संशयित रुग्ण नसून नागरिकांनी अफवांवर विश्वास न ठेवता आवश्यक ती खबरदारी घ्यावी, असे आवाहन जिल्हाधिकारी नवल किशोर राम यांनी केले. या विषाणूचा प्रादुर्भाव रोखण्यासाठी प्रशासनाने आवश्यक त्या सर्व प्रतिबंधात्मक उपाययोजना सुरू केल्या आहेत.
जिल्हाधिकारी म्हणाले, “करोना’बाबत सोशल मीडियावर अफवा पसरवल्या जात आहे, त्यावर विश्वास ठेऊ नये. इतर संसर्गजन्य रोगांबाबत आपण जी काळजी घेतो, तशीच खबरदारी सर्वांनी घ्यावी. साबणाने हात धुणे, मास्क वापरणे याबाबत दक्षता घ्यावी. शिंकणे, खोकल्यातून बाहेर पडणाऱ्या थुंकीच्या वाटे या विषाणूचा प्रसार होतो.
त्यामुळे नागरिकांनी सामाजिक शिष्टाचार पाळणे आवश्यक असून खोकतांना, शिंकताना नाका-तोंडावर रुमाल ठेवावा, असे आवाहन त्यांनी केले. खोकला किंवा तत्सम आजार झाल्यास तत्काळ वैद्यकीय तपासणी करून उपचार करून घ्यावे. भविष्यात राज्यात किंवा पुणे जिल्ह्याता “करोना’ आला, तरी जिल्ह्यातील सर्व यंत्रणा उपचारासाठी दक्ष असून नागरिकांनी भीती बाळगू नये, असे जिल्हाधिकारी राम यांनी सांगितले.
“ससून रुग्णालयात स्वतंत्र कक्ष असावा’
करोना विषाणूला पायबंद घालण्याच्या दृष्टिकोनातून ससून सर्वोपचार रुग्णालयात स्वतंत्र कक्ष स्थापन करण्याची मागणी भाजपचे शहराध्यक्ष जगदीश मुळीक यांनी केली.
मुळीक यांनी ससूनचे उपअधिष्ठाता राजेश कार्यकर्ते यांची भेट घेऊन प्रतिबंधात्मक उपाययोजनांची माहिती घेतली. डॉ. अजय तावरे, जयप्रकाश पुरोहित, एस. आर. मिश्रा यावेळी उपस्थित होते. मुळीक म्हणाले, “नायडू आणि सरदार वल्लभभाई पटेल रुग्णालयांत स्वतंत्र कक्ष निर्माण करण्यात आले आहेत. जिल्ह्याच्या ग्रामीण भागात अद्याप एकाही कक्षाची व्यवस्था केलेली नाही. त्यामुळे सध्याच्या कक्षांवर ताण येऊ नये म्हणून ससून रुग्णालयात तातडीने स्वतंत्र कक्ष निर्माण करावा कक्ष, आवश्यकतेनुसार अतिदक्षता विभाग आणि आवश्यक सुविधा पुरवाव्यात.’
उपचारासाठी यंत्रणा तयार – महापालिका सहायक आरोग्य अधिकारी
करोना विषाणूसंदर्भात बुधवारी नायडू रुग्णालयात चार नवीन संशयित रुग्ण आले आहेत. त्यांचे नमुने तपासणीसाठी पाठवण्यात आले आहेत. दरम्यान, करोना विषाणूचा संभावित प्रादूर्भाव रोखण्यासाठी पुणे महापालिका प्रशासन सज्ज असून, शहरात विविध रुग्णालयांमध्ये या विषाणूच्या संशयितांच्या तपासणी आणि उपचारांसाठी यंत्रणा तयार असल्याची माहिती महापालिकेचे सहायक आरोग्य अधिकारी डॉ. संजीव वावरे यांनी दिली.
करोना संदर्भात महापालिकेच्या नायडू रुग्णालयात तयारीबाबत आढावा घेण्यात आला. यावेळी पत्रकारांशी बोलताना डॉ. वावरे म्हणाले, “जिल्ह्यात “करोना’चा एकही बाधित रुग्ण नसून नागरिकांनी अफवांवर विश्वास न ठेवता आवश्यक ती खबरदारी घ्यावी. विषाणूचा प्रादुर्भाव रोखण्यासाठी प्रशासनाने आवश्यक प्रतिबंधात्मक उपाययोजना सुरू केल्या आहेत. यामध्ये नायडू रुग्णालय येथे सहा बेड तयार असून, गरज पडल्यास ही क्षमता 90 पर्यंत वाढवता येऊ शकते.
ससून रुग्णालयात आठ, तर शहरातील दहा खाजगी रुग्णालायत मिळून 30 बेड तयार करण्यात आले आहे. तसेच नायडू रुग्णालयात संशयितांसाठी एक विलगीकरण कक्ष (आयसोलेटेड वॉर्ड) तयार करण्यात आला आहे. येथे कर्मचाऱ्यांव्यतिरिक्त इतर कोणालाही जाण्यास परवानगी नाही. संशयितांच्या नातेवाईकांनादेखील भेट घेण्यापूर्वी सुरक्षित साधने दिली जातात.’
अफवांवर विश्वास ठेवू नये
“करोना’बाबत सोशल मीडियावर अफवा पसरवल्या जात आहे, त्यावर विश्वास ठेवू नये. इतर संसर्गजन्य रोगाच्या बाबतीत आपण जी काळजी घेतो, तशीच खबरदारी सर्वांनी घ्यावी. साबणाने हात स्वच्छ धुणे, मास्क वापरणे याबाबत दक्षता घ्यावी. शिंकणे, खोकल्यातून बाहेर पडणाऱ्या थुंकीवाटे या विषाणूचा प्रसार होतो. खोकला किंवा तत्सम आजार झाल्यास तत्काळ वैद्यकीय तपासणी करून उपचार करून घ्यावे.