पुणे – करोनाने जगाला एका श्वासाची किंमत दाखवून दिली. करोनाकाळात ऑक्सिजन उपलब्ध न झाल्याने झालेले मृत्यू या सगळ्या पार्श्वभूमीवर ऑक्सिजन प्लॅन्ट आणि एकूणच या प्रक्रियेला मिळालेली गतीमध्ये “अन्न आणि औषध प्रशासना’ची भूमिका महत्त्वाची ठरली.
सप्टेंबर 2020 मध्ये करोनाने हाहा:कार माजवला; त्यावेळी गंभीर रुग्णांची संख्या मोठ्याप्रमाणात होती. त्यावेळी ऑक्सिजनची मागणी केवळ सरकारी नव्हे तर खासगी रुग्णालयांतूनही वाढली. ही मागणी दररोज सुमारे 220 मेट्रिक टनांपर्यंत गेली होती. ती मागणीही त्यावेळी कसरत करून पूर्ण करण्यात आली.
ऑक्सिजन उत्पादक कंपन्या आणि वितरकांच्या मर्यादित क्षमतेमुळे मागणीच्या तुलनेत ऑक्सिजनचा पुरवठा कमी होत होता. त्यामुळे अनेक रुग्णालयांना दुप्पट पैसे देऊन ऑक्सिजन सिलिंडर खरेदी करावा लागला होता. याशिवाय अनेकांकडे सिलेंडरच उपलब्ध नसल्याने त्याची साठवणूक कशी करायची असा प्रश्न होता. पुणे विभागात दोनच ऑक्सिजन उत्पादक कंपन्या होत्या, त्यांची क्षमता सुमारे 230 मेट्रिक टन प्रति दिन होती.
त्यानंतर एफडीएने आणखी एका कंपनीच्या एअर लिक्विड ऑक्सिजन प्रकल्पाला परवानगी दिली. त्यामुळे ऑक्सिजन उत्पादक क्षमता शंभर टनांनी वाढली. उत्पादक कंपन्यांकडून ऑक्सिजन घेऊन सिलिंडरमध्ये भरून वितरित करणाऱ्या वितरकांची संख्या करोना पूर्व काळात नऊ होती. ही वितरक संख्या 26 पर्यंत वाढवण्यात आली. याशिवाय या वितरकांची व्यवस्था वेगवेगळ्या प्रमुख रस्त्यांवर करण्यात आली.
बाधितांची आणि त्यातूनही गंभीर बाधितांची संख्या आधीच्या तुलनेत कमी असल्याने ऑक्सिजनची मागणी 80 ते 90 मेट्रिक टन प्रतिदिन अशी स्थिरावली आहे. आपत्कालिन परिस्थिती ओढावली तर यंत्रणा तयार आहे.
– डॉ. एस. व्ही. प्रतापवार, “एफडीए’चे सहायक आयुक्त
ऑक्सिजनची मागणी (प्रतिदिन)
पुणे शहरात सप्टेंबर महिन्यात : 220 मेट्रिक टन
पुणे शहरात सध्या : 80 ते 90 मेट्रिक टन
पुणे विभागात सप्टेंबर महिन्यात : 335 मेट्रिक टन
पुणे विभागात सध्या : 115 मेट्रिक टन
उत्पादक कंपन्या : चार
वितरक : 26