लॉस एंजेलिस – करोना विषाणूचा संसर्ग झाला आहे की नाही, हे केवळ 45 मिनिटात समजण्याची तपासणी पद्धती शास्त्रज्ञांनी विकसित केली आहे. व्यक्तीच्या घशातील स्रावाचा नमुना घेऊन ही तपासणी केली जाऊ शकणार आहे. इतक्या झटपट रुग्णाच्या टेस्टचा रिझल्ट मिळाल्यावर पटापट उपचार करणेही आता शक्य होणार आहे. त्यामुळे टेस्टचा रिझल्ट येईपर्यंत खोळांबून राहिल्याने उपचाराला होणारा विलंब टाळता येऊ शकणार आहे.
“सार्स-कोव्ह-2 डिटेक्टर’ असे या टेस्टचे नाव ठेवण्यात आले आहे. ही टेस्ट करणेही सोपे आणि त्याचा निष्कर्श समजून घेणेही तितकेच सोपे असणार आहे. या टेस्टसाठी कोणतीही विशेष उपकरणांची आवश्यकताही नाही, असे सॅन फ्रान्सिस्को, कॅलिफॉर्निया विद्यापिठातील (युसीएसएफ) शास्त्रज्ञांनी सांगितले.
“नेचर बायोटेक्नोलॉजी’ या विज्ञानविषयक नियतकालिकामध्ये या टेस्टबाबतचा शोधनिबंध प्रसिद्ध करण्यात आला आहे. ही टेस्ट किती उपयोगी ठरू शकते, याबाबत या शोधनिबंधामध्ये सविस्तर विवेचन केले गेले आहे. सध्या मोठ्या प्रमाणावर उपलब्ध असलेल्या “कोविड-19′ टेस्ट किटपेक्षाही या टेस्टचे साहित्य सहज उपलब्ध आहे. या नवीन टेस्टला अद्याप युएस फूड ऍन्ड ड्रग ऍडमिनिस्ट्रेशनकडून मान्यता मिळालेली नाही. या टेस्टच्या निष्कर्शांमधील वैधता संशोधकांकडून तपासली जात आहे. त्यासाठी अगदी तात्काळ मंजुरी प्रक्रियेचा अवलंब केला जातो आहे.
नव्याने स्वीकारलेल्या “क्रिस्पार’ टेक्नोलॉजीमुळे “कोविड-19’च्या तपासणीला वेग येईल, असे असे “युसीएसएफ’मधील प्राध्यापक आणि या प्रकल्पाचे सहप्रमुख चार्ल्स चिऊ यांनी म्हटले आहे. या टेस्टमधील “क्रिस्पार’ टेक्नोलॉजीचा विस्तार जनुकीय संरचनांसाठी करता येऊ शकतो. सध्या शास्त्रज्ञांनी या टेस्टसाठीचा प्रोग्रॅम “कोविड-19’च्या अनुषंगानेच केला आहे. यापैकी एक जनुकीय संरचना “सार्स’सारख्या विषाणूशी साधर्म्य असणारी आहे. तर दुसरी संरचना “सार्स-कोव्ह-2’शी संबंधित आहे. यामुळेच “कोविड-19’ची लागण होते.
ही टेस्ट अत्यंत संवेदनशील आहे आणि रुग्णाच्या घशातून घेतलेल्या द्रवपदार्थाच्या मायक्रोलिटरमध्ये कमीतकमी 10 करोना विषाणू असतील तरी ते शोधले जाऊ शकतात. एक मायक्रोलीटर म्हणजे एका थेंबाच्या शेकडो छोटा अंश असतो.
सध्याच्या “पीसीआर’ आधारित टेस्टपेक्षा ही टेस्ट थोडी कमी संवेदनशील आहे. दोन्ही टेस्टमधील तफावत अगदी नगण्य आहे. पण तरिही नवी पद्धत अधिक किफायतशीरच ठरते.