नवी दिल्ली – सध्या चीनसह जपान, दक्षिण कोरिया या देशांमध्ये कोरोनाची रूग्णसंख्या वाढत असून त्यामुळे मृत्यू होणाऱ्यांचे प्रमाणही वाढत आहे. बीएफ-7 हा नविन प्रकारचा करोनाचा विषाणून असल्याचे सांगितले जात आहे. अनेकांना त्याचे निदान झाले असून रुग्णसंख्या वाढत आहे. यापार्श्वभूमीवर केंद्रीय आरोग्यमंत्री मनसुख मांडविया यांनी कोरोनापरिस्थितीबाबत लोकसभेत माहिती दिली आहे. ते म्हणाले, जपान, चीन, दक्षिण कोरियासह अनेक देशांमध्ये कोरोनाचे रुग्ण वाढत आहेत तसेच कोरोनामुळे मृत्यू होण्याचे प्रमाणही वाढत आहे. कोरोनामुळे बिघडलेली परिस्थिती पाहता आरोग्य मंत्रालयाने पावले उचलण्यास सुरुवात केली आहे.
परदेशातून भारतात येणाऱ्या प्रवाशांची विमानतळावर कोविड तपासणी –
केंद्रीय आरोग्य मंत्री आरोग्य मंत्री मनसुख मांडविया यांनी सांगितले की, आम्ही आंतरराष्ट्रीय विमानतळावर परदेशातून भारतात येणाऱ्या लोकांची कोविड चाचणी सुरू केली आहे. आम्ही साथीच्या रोगाचा सामना करण्याचा निर्धार केला आहे आणि योग्य पावले उचलत आहोत.
मास्क, सॅनिटायझरचा पुन्हा वापर करा –
केंद्रीय आरोग्य मंत्री मनसुख मांडविया यांनी लोकसभेत सांगितले की, सण आणि नवीन वर्षाचा हंगाम लक्षात घेता, राज्यांना खबरदारीच्या उपायांसाठी जागरूकता वाढवण्याचा तसेच लोकांनी मास्क घालणे, सॅनिटायझर वापरणे आणि सामाजिक अंतर पाळणे याची काळजी घेण्याचा सल्ला दिला आहे.
पीएम मोदी मास्क घालून राज्यसभेत पोहोचले –
दरम्यान, कोरोनाचा वाढता प्रभाव लक्षात घेता राज्यसभेच्या कामकाजात सहभागी होण्यासाठी पंतप्रधान नरेंद्र मोदी आणि इतर अनेक खासदार मास्क घालून पोहोचले होते. त्यामुळे आता पुन्हा एकदा सर्वांना मास्क, सॅनिटायझर, सामाजिक अंतर पाळणे हे बंधनकारक होण्याची शक्यता आहे.
