मुंबई – मुंबईसह राज्यात करोनाचा प्रादूर्भाव वाढू लागल्याने दुबईसह संयुक्त अरब अमिरात (युएई) येथून मुंबईत येणाऱ्या प्रवाशांना बंधनकारक असणारी सात दिवस गृहविलगीकरण आणि त्या नंतर आरटीपीसीआर टेस्टमधून सवलत देण्यात आली आहे.
मुंबईत करोनाचा विषाणू ओमिक्रॉन व्हेरियंटचा वाढता धोका लक्षात घेऊन मुंबई महापालिकेने डिसेंबरच्या अखेरच्या आठवड्यात आंतरराष्ट्रीय प्रवाशांसाठी दिशानिर्देश जारी केले होते. दुबईसह यूएईमधून मुंबईत येणाऱ्या प्रवाशांना 7 दिवसांचे होम क्वारंटाइन आणि आरटीपीसीआर टेस्ट बंधनकारक करण्यात आले होते. तर राज्याच्या अन्य परिसरात राहणाऱ्या व्यक्ती, ज्या या आंतरराष्ट्रीय विमानांतून येतील त्यांना सार्वजनिक वाहनांचा वापर करण्यास परवानगी नसेल. त्यांच्यासाठी वाहनांची सोय उपलब्ध करून दिली जाईल, असा निर्णय मुंबई महापालिकेने घेतला होता.
मुंबईतील ओमिक्रॉन आणि करोनाबाधितांचा संख्या गेल्या काही दिवसांपासून कमी होत आहे. त्यामुळे मुंबई महापालिकेने आंतरराष्ट्रीय प्रवाशांसाठी नवीन निर्देश दिले आहेत. आता दुबईसह यूएईमधून येणाऱ्या प्रवाशांना 7 दिवसांचे होम क्वारंटाइन आणि आरटीपीसीआर टेस्ट या निर्बंधांतून सूट देण्यात आली.
दरम्यान, मुंबईत करोना रुग्णवाढीचा आलेख सलग चौथ्या दिवशी घसरला आहे. कालच्या तुलनेत करोनाबाधितांच्या संख्येत मोठी घट झाल्याचे दिसून येत आहे. आज, रविवारी प्रसिद्ध केलेल्या अहवालानुसार, मुंबईत गेल्या 24 तासांमध्ये 7895 नवीन करोनाबाधित आढळले आहेत. तर 11 करोना रुग्णांचा मृत्यू झाला आहे. त्यानुसार आता मुंबईत सक्रिय रुग्णांची संख्या 60371 इतकी आहे.