Congress President Death : उत्तर प्रदेशातील देवरिया जिल्ह्यात भीषण रस्ते अपघातात काँग्रेसचे स्थानिक नेते जितेंद्र जयस्वाल यांचा जागीच मृत्यू झाला. या घटनेमुळे परिसरात आणि राजकीय वर्तुळात शोककळा पसरली आहे. ही दुर्घटना शनिवारी सायंकाळी साडेसातच्या सुमारास बरहाज येथील राम जानकी मार्गावर घडली. जितेंद्र जयस्वाल हे आपल्या दुचाकीवरून जात असताना समोरून येणाऱ्या अज्ञात वाहनाने त्यांच्या मोटरसायकलला जोरदार धडक दिली. धडकेनंतर ते रस्त्यावर फेकले गेले आणि गंभीर जखमी झाले. घटनेनंतर स्थानिक नागरिकांनी आणि कुटुंबीयांनी तात्काळ त्यांना बरहाज येथील सामुदायिक आरोग्य केंद्रात दाखल केले. मात्र, डॉक्टरांनी तपासणीअंती त्यांना मृत घोषित केले. पोलिसांनी मृतदेह ताब्यात घेऊन शवविच्छेदनासाठी पाठवला असून अज्ञात वाहनाचा शोध सुरू केला आहे. ३५ वर्षीय जयस्वाल हे बरहाजमधील आझाद नगर दक्षिण येथील रहिवासी होते आणि काँग्रेस पक्षाचे शहर अध्यक्ष म्हणून कार्यरत होते. त्यांच्या पश्चात पत्नी, १७ वर्षांचा मुलगा आणि मुलगी असा परिवार आहे. दरम्यान, गेल्या वर्षी होळीच्या दिवशी त्यांच्या मोठ्या मुलाचा सरयू नदीत बुडून मृत्यू झाला होता. या घटनेतून कुटुंब सावरत असतानाच आता झालेल्या अपघातामुळे त्यांच्यावर दु:खाचा डोंगर कोसळला आहे. या घटनेनंतर रुग्णालयाबाहेर काँग्रेस कार्यकर्त्यांची मोठी गर्दी झाली होती. पोलिस अधिकाऱ्यांनी घटनेची नोंद घेऊन पुढील तपास सुरू असल्याची माहिती दिली आहे.
