नवी दिल्ली : गुजरात दंगलीवर आधारित बीबीसीने ‘इंडिया: द मोदी क्वेशन’माहितीपट नुकताच प्रदर्शित केला होता. त्याचा पहिला भाग प्रसारित झाल्यानंतर आता दुसऱ्या भागावर केंद्र सरकारने बंदी घातली आहे. यामध्ये पंतप्रधान नरेंद्र मोदी यांची बदनामी करण्यात आल्याचे सांगण्यात येत आहे त्यामुळे ही बंदी घालण्यात आली असल्याचे म्हटले जात जात आहे. दरम्यान, या माहितीपटावर केंद्र सरकारने बंदी आणल्यानंतर काँग्रेससह विरोधीपक्षांनी मोदी सरकारवर निशाणा सढळ आहे. मात्र दुसरीकडे काँग्रेसचे वरिष्ठ नेते एके अँटनी यांचे पुत्र अनिल अँटनी यांनी या माहितीपटाला विरोध केल्याने राजकीय क्षेत्रात चर्चांना उधाण आले आहे.
अनिल अँटनी यांनी ट्वीट करत या माहितीपटाला विरोध केला आहे. भाजपाशी आमचे वैचारिक मतभेद आहेत. मात्र, तरीही मला वाटतं की या माहितीपटामुळे देशाच्या सार्वभौमत्वाला धोका निर्माण होऊ शकतो, असं ते म्हणाले. तसेच जे लोकं बीबीसी आणि ब्रिटनचे माजी परराष्ट्र सचिव जॅक स्ट्रॉ यांचं समर्थन करत आहेत, ते लोक चुकीचा पायंडा पाडत आहेत, असे स्पष्ट मत अँटनी यांनी आपल्या ट्विटमध्ये नोंदवले आहे.
Despite large differences with BJP, I think those in 🇮🇳 placing views of BBC, a 🇬🇧 state sponsored channel with a long history of 🇮🇳 prejudices,and of Jack Straw, the brain behind the Iraq war, over 🇮🇳 institutions is setting a dangerous precedence,will undermine our sovereignty.
— Anil K Antony (@anilkantony) January 24, 2023
विशेष म्हणजे काँग्रेसने प्रजासत्ताक दिनी या माहितीपटाचे स्क्रिनिंग करण्याचा निर्णय घेतला आहे. केरळ काँग्रेसच्या अल्पसंख्याक सेलचे अध्यक्ष शिहाबुद्दीन करयात यांनी याबाबत एक निवेदन प्रसिद्ध केले आहे. प्रजासत्ताक दिनी हा माहितीपट काँग्रेस पक्षाच्या जिल्हा मुख्यालयात प्रदर्शित केला जाणार असल्याचे या निवेदनातुन सांगण्यात आले आहे.
बीबीसीच्या माहितीटावरून भारतात राजकीय वादळ निर्माण झाल्यानंतर केंद्र सरकारच्या माहिती आणि प्रसारण मंत्रालयाच्या आदेशानुसार हा माहितीपट यूट्यूब आणि ट्विटरवर ब्लॉक करण्यात आला आहे. माहिती आणि प्रसारण मंत्रालयाचे सचिव यांनी आयटी नियम, २०२१ अंतर्गत आणीबाणीच्या अधिकारांचा वापर करत निर्देश जारी केले आहेत.
