नवी दिल्ली – अरूणाचल प्रदेशचे मुख्यमंत्री पेमा खंडू यांच्या ताफ्यात तब्बल 1 कोटी 80 लाख रूपयांची रोकड सापडल्याचा आरोप कॉंग्रेसने बुधवारी केला. त्या प्रकरणावरून खंडू यांच्याबरोबरच पंतप्रधान नरेंद्र मोदी यांच्याविरोधात निवडणूक आयोगाने गुन्हा दाखल करावा, अशी मागणीही पक्षाने केली.
कॉंग्रेसचे मुख्य प्रवक्ते रणदीप सुर्जेवाला यांनी येथे पत्रकार परिषदेत रोकड सापडल्याचा आरोप करताना दोन व्हिडीओ दाखवले. ते व्हिडीओ सोशल मीडियावर उपलब्ध असल्याचे सांगताना त्यांनी त्यांच्या विश्वासार्हतेबाबत कुठली हमी दिली नाही. निवडणूक आयोगाच्या अधिकाऱ्यांच्या उपस्थितीत ती रोकड सापडल्याचा दावाही त्यांनी केला. अरूणाचलच्या पासीघाटमध्ये सकाळी मोदींची सभा होण्याआधी मध्यरात्रीच्या सुमारास ती रोकड आढळली. मोदींच्या सभेच्या आयोजनासाठी त्या रकमेचा वापर केला जाणार होता का? एवढी मोठी रक्कम कुठून आली? निवडणूक आयोगाकडून गुन्हा दाखल का करण्यात आला नाही, असे सवाल सुर्जेवाला यांनी उपस्थित केले. निवडणूक आयोगाकडून संबंधित प्रकरणाबाबत कुठली प्रतिक्रिया देण्यात आली नाही.