-हिमांशू
आजच्या काळात “पॉझिटिव्ह’ या शब्दाइतका “निगेटिव्ह’ शब्द नाही. एखादा सूक्ष्म विषाणू सगळं कसं उलटंपालटं करून टाकतो ना? ताणतणावांनी घेरलेल्या अवस्थेत माणसानं “पॉझिटिव्ह’ विचार करावा म्हणून प्रयत्न केले जातात आणि वृत्तवाहिन्यांमध्ये “पॉझिटिव्ह’ बातम्या दाखवाव्यात अशी अपेक्षा केली जाते. प्रत्येक वृत्तवाहिन्यांवर “पॉझिटिव्ह’ रुग्णांची संख्या वाढत असल्याची बातमी दररोज दाखविली जाते आणि त्यामुळे समाजात “निगेटिव्ह’ चिंतन वाढत चालल्याचे मानसतज्ज्ञांचं निरीक्षण आहे.
ज्याप्रमाणं “कॉमन सेन्स’ ही गोष्ट म्हणतात तेवढी “कॉमन’ असत नाही, त्याचप्रमाणे “पॉझिटिव्ह’ हा शब्द म्हणावा तितका सकारात्मक असत नाही, असं अनेकांना वाटू लागले असल्यास त्यात काहीच नवल नाही. “पॉझिटिव्ह’ आणि “निगेटिव्ह’ या शब्दांमध्ये अशा प्रकारे कन्फ्यूजन होणं एकवेळ मान्य करता येईल. पण एकच गोष्ट एका डोळ्याला “पॉझिटिव्ह’ आणि एका डोळ्याला “निगेटिव्ह’ दिसली, तर कसं समजून घ्यायचं? नेमका हाच प्रश्न अहमदनगरमधल्या तरुणाला पडला आणि कन्फ्यूजन दूर करण्यासाठी त्याने थेट मुख्यमंत्र्यांनाच पत्र लिहिलं.
या तरुणानं सलग तीनदा करोना चाचणी केली आणि तिचा अहवाल एकदा “निगेटिव्ह’ तर दोनदा “पॉझिटिव्ह’ आलाय… तोही एकआड एक! म्हणजे पहिला “पॉझिटिव्ह’, दुसरा “निगेटिव्ह’ आणि तिसरा पुन्हा “पॉझिटिव्ह’. आता उपचार घ्यायचे की क्वारंटाइन व्हायचं, की आणखी काही करायचं, हेच त्याला कळेनासं झालंय.
या तरुणाने तीन चाचण्या करून घेतल्या असल्या, तरी त्या दोन पद्धतींनी केलेल्या आहेत. पहिली आणि तिसरी चाचणी “रॅपिड टेस्ट’ अर्थातच “ऍन्टीजन टेस्ट’ प्रकारातील आहे, तर दुसऱ्या चाचणीत स्वॅबची तपासणी झाली आहे. शहर आणि जिल्हा प्रशासनासह काही संस्थांनी आयोजित केलेल्या उपक्रमात या तरुणानं ऍन्टीजन टेस्ट करून घेतली आणि ती “पॉझिटिव्ह’ आल्यामुळे त्याचे धाबे दणाणले. परंतु त्या उपक्रमात बहुतेकांचा अहवाल “पॉझिटिव्ह’ येत असल्याचे पाहून तरुणाला शंका आली आणि त्यानं सिव्हिल हॉस्पिटलमध्ये स्वॅब दिला. दोन दिवसांनी या चाचणीचा अहवाल “निगेटिव्ह’ आला. आता दोन चाचण्यांचे दोन वेगळे अहवाल आल्यामुळे वास्तव जाणून घेतलंच पाहिजे म्हणून या तरुणानं “बेस्ट ऑफ थ्री’ पर्याय स्वीकारून पुन्हा ऍटीजन टेस्ट करून घेतली.
ती “पॉझिटिव्ह’ आल्यामुळे तरुणाने उपचारांसाठी सिव्हिल हॉस्पिटलमध्ये धाव घेतली. तिथले डॉक्टर म्हणाले, “तुम्ही निगेटिव्ह आहात. उपचारांची गरज नाही.’ शेवटी दोन्ही ठिकाणं सोडून या तरुणानं खासगी रुग्णालयाची वाट धरली. तिथं “एचआरसीटी’ ही चाचणी करण्याचा सल्ला मिळाला. सामान्यतः फुफ्फुसाशी संबंधित आजार आणि न्यूमोनिया यासाठी ही चाचणी घेतली जाते, हे माहीत असल्यामुळे तरुण अधिकच गोंधळात पडला.
“पॉझिटिव्ह’ आणि “निगेटिव्ह’च्या या खेळात (वस्तुतः घोळात) आपण गोंधळून गेलो आहोत आणि आपलं काही बरंवाईट झालं तर त्याची जबाबदारी जिल्हा प्रशासनावर असेल, असं पत्र या तरुणानं मुख्यमंत्र्यांना लिहिलंय. करोनाच्या बाबतीत मुळातच कन्फ्यूजन जास्त आहेत… अगदी सुरुवातीपासून! त्यातच सोशल मीडियावर वेगवेगळे दावे करणाऱ्यांनी हे कन्फ्यूजन गडद केलंय.
सोशल मीडियावरील माहिती विश्वासार्ह मानणारे अनेकजण (अजूनही) आहेत. परंतु सरकारमान्य चाचणी पद्धतींमध्ये तरी एकवाक्यता असावी, ही अपेक्षा अवाजवी नाही.