दिलासा! देशात २ ते ६ वर्षांच्या मुलांवर पुढील आठवड्यात कोवॅक्सिनच्या दुसऱ्या डोसची चाचणी

दिल्लीतील AIIMS मध्ये सुरू होणार चाचणी

नवी दिल्ली : करोनाच्या दुसऱ्या लाटेने  देशात अक्षरशः धुमाकूळ घातला होता. परंतु आता दुसरी लाट नियंत्रणात येताना दिसत आहे. अशातच आता २ ते ६ वर्षे या वयोगटातील मुलांच्या कोवॅक्सिनच्या दुसऱ्या डोसची चाचणी पुढील आठवड्यात सुरू होण्याची शक्यता वर्तवण्यात येत आहे. या वयोगटातील काही मुलांना पहिला डोस देण्यात आला आहे.

एका वृत्तसंस्थेने  याबाबतचे वृत्त दिले आहे. स्वदेशी कंपनी भारत बायोटेक मुलांवर पहिल्या अँटी करोना लसीची चाचणी करत आहे. दिल्लीत ६ ते १२ या वयोगटातील मुलांना पहिला डोस देण्यात आला आहे.

सध्या देशात २ ते १८ या वयोगटातील मुलांवर कोवॅक्सिनची चाचणी सुरू आहे. दिल्लीसह देशातील सहा सेंटर्सवर ५७५ मुलांवर ही चाचणी करण्यात येत आहे. सध्या पहिला डोस त्यांना देण्यात आला असून दुसरा डोस देण्यास सुरूवात झाली आहे. परंतु याची माहिती मिळण्यास सप्टेंबर महिन्यापर्यंतची वाट पाहावी लागणार आहे.

अंतिम अहवाल आल्यानंतरच ही लस इतर मुलांना दिली जाऊ शकते का नाही याचा निर्णय घेतला जाईल. लहान मुलांवर त्यांच्या वयानुसार लसीची तीन टप्प्यांत चाचणी घेतली जात आहे. पहिल्या टप्प्यात १२ ते १८, तर दुसऱ्या टप्प्यात ६ ते १२ आणि तिसऱ्या टप्प्यात २ ते ६ वर्षांच्या मुलांचा समावेश आहे. करोना प्रतिबंधात्मक लसींची मुलांवरील चाचणी लवकरच पूर्ण होणार असल्याची माहिती यापूर्वी केंद्र सरकारने उच्च न्यायालयाला दिली होती.

डिजिटल प्रभातचे टेलिग्राम जॉईन करण्यासाठी येथे क्लिक करा

You might also like

Comments are closed.