पुणे – साध्या सर्दी खोकल्यापासून ते मर्स किंवा सार्स यासारख्या गंभीर आजारास कारणीभूत असणाऱ्या एका विशिष्ट प्रकारच्या विषाणू गटाला “करोना’ म्हणतात. हा नवा विषाणू “एनसीओवी’ (novel corona virus 2019 (nCov) असल्याचे सिद्ध झाले आहे. सन 2003मध्ये आढळलेला (सार्स) हा देखील एक प्रकारचा “करोना’च होता.
सध्या चीनमध्ये हुबेई प्रांतातील कहान शहरात या विषाणूचा प्रादूर्भाव पसरलेला आहे. दरम्यान, या विषाणूची जनुकीय रचना पूर्णपणे नवीन असल्याने त्याला नॉव्हेल करोना विषाणू असे नाव देण्यात आले आहे. दरम्यान, या विषाणूचा प्रादूर्भाव आपल्या राज्यात होण्याची शक्यता कमी असल्याचे तज्ज्ञांचे मत आहे.
या विषाणूचा प्रसार कशाप्रकारे होतो याची निश्चित माहिती सध्या तरी माहिती नाही. तसेच त्यासाठी कोणतीही लस अथवा औषध उपलब्ध नाही. करोना विषाणू प्राणीजन्य आजार असला, तरी नवीन विषाणू नक्की कोणत्या प्राण्याच्या संपर्कातून पसरतो याबद्दल निश्चित माहिती नाही. मात्र, लक्षणाचे स्वरूप पाहता शिंकणे, खोकणे यावेळी हवेमार्फत या विषाणूचा प्रसार होत असावा, असा अंदाज आहे. जिल्हा आणि महापालिकेने त्यांच्या कार्यक्षेत्रातील खासगी वैद्यकीय व्यावसायिकांना या संदर्भातील माहिती द्यावी.
पुण्यात महाराष्ट्र राष्ट्रीय विषाणू विज्ञान संस्था उपलब्ध असून निदानासाठी रुग्णांचे कोणते नमुने घ्यावेत आणि ते प्रयोगशाळेत कसे पाठवावेत, याबाबतची माहिती www.niv.co.in या संकेतस्थळावर उपलब्ध आहे. नमुने पाठवताना ते जिल्हा शल्य चिकित्सकांमार्फत राज्य आय.डी.एस.पी.विभागाच्या अनुमतीने पाठवावे. यासंदर्भातील अधिक माहितीसाठी www.who.int या संकेतस्थळाचा उपयोग करावा.
करोना विषाणू आजाराची सर्वसामान्य लक्षणे
– सर्दी, खोकला (कॉमन कोल्ड)
– गंभीर स्वरुपाची श्वसन संस्थेची लक्षणे
– श्वास घ्यायला त्रास होणे, श्वासास अडथळा
– न्यूमोनिआ, पचनसंस्थेची लक्षणे; अतिसार
– काही रुग्णांमध्ये मूत्रपिंड निकामी होणे
– प्रतिकार शक्तीची कमतरता असलेल्यांना असामान्य लक्षणे आढळू शकतात.
प्रतिबंधकात्म खबरदारी अशी घ्यावी
या विषाणूचा उगम कसा झाला आणि त्याचा प्रसार कसा होतो हे निश्चितपणे माहित नाही. मात्र, सर्वसाधारणपणे आजाराचे स्वरूप लक्षात घेता हा आजार टाळण्यासाठी प्रतिबंधात्मक खबरदारी घेणे आवश्यक आहे. त्यामध्ये प्रथमत: श्वसन संस्थेचा आजार असलेल्या व्यक्तींशी निकट सहवास टाळणे. हातांची नियमित स्वच्छता, न शिजवलेले अथवा अपुरे शिजवलेले मांस खाऊ नये. फळे, भाज्या न धुता खाऊ नयेत. खोकताना, शिंकताना नाका तोंडावर रूमाल किंवा टिश्यू पेपर वापरावा. वापरलेले टिश्यूपेपर त्वरीत झाकणबंद कचरा पेटीत टाकावे.