पुणे – बालकलावंतांना राज्यस्तरावर व्यासपीठ उपलब्ध व्हावे, या उद्देशाने बालरंगभूमी परिषदेच्या वतीने पहिल्या बालरंगभूमी संमेलनाचे आयोजन करण्यात येत आहे. हे संमेलन बिबवेवाडी येथील अण्णा भाऊ साठे स्मारक येथे दि. २० ते २२ डिसेंबर या कालावधीत होणार आहे. ही घोषणा बालरंगभूमी परिषदेच्या अध्यक्ष अभिनेत्री ॲड. नीलम शिर्के- सामंत यांनी दिली.
बालरंगभूमी संमेलनाध्यक्षपदी सिने-नाट्य अभिनेते मोहन जोशी यांचे नाव निश्चित झाले असून संमेलनाचे उद्घाटन जेष्ठ अभिनेते डॉ. मोहन आगाशे यांच्या हस्ते होईल. प्रमुख पाहुणे नाट्य परिषदेचे अध्यक्ष अभिनेते प्रशांत दामले, अभिनेते सयाजी शिंदे, अजित भुरे, अभिनेते व सेन्सॉर बोर्डाचे अध्यक्ष विजय गोखले, सविता मालपेकर, सुबोध भावे यांच्यासह नाट्य व बालनाट्य क्षेत्रातील मान्यवरांची प्रमुख उपस्थिती असणार आहे.
संमेलन समारोप व पुरस्कार सोहळा २२ डिसेंबर रोजी सायंकाळी ५ वाजता होणार असून या प्रसंगी बालरंगभूमी परिषद पुरस्कार जेष्ठ नाट्यकर्मी प्रतिभा मतकरी यांना देण्यात येणार आहे. याप्रसंगी डॉ. मोहन आगाशे, सचिन पिळगावकर, मोहन जोशी, गंगाराम गव्हाणकर, प्रियदर्शनी इंदुलकर, गणेश मतकरी, ऋजुता देशमुख व इतर मान्यवरांच्या प्रमुख उपस्थितीत सलील कुलकर्णी, संदीप खरे, पद्मश्री परशुराम गंगावणे, उदय देशपांडे, मेघना एरंडे, शैलेश दातार यांचा सन्मान करण्यात येणार आहे.
ही माहिती देताना बालरंगभूमी परिषदेचे कार्याध्यक्ष राजू तुलालवार, उपाध्यक्ष शैलेश गोजमगुंडे, दीपा क्षीरसागर, सतीश लोटके, नंदकुमार जुवेकर, पुणे शाखेच्या अध्यक्ष दीपाली शेळके, कार्यकारी सदस्य दिलीप रेगे, योगेश शुक्ल, नागसेन पेंढारकर, अनंत जोशी, देवेंद्र भिडे उपस्थित होते.
बालकांसाठी होणारे कार्यक्रम –
बालकलावंत मायरा वायकुळ, निलेश गोपणार, स्वरा जोशी व इतर बाल कलावंताचे सादरीकरण होणार आहे. बाल कलावंतांची भव्य शोभायात्रा काढण्यात येणार आहे. यात विविध कलांचे, चित्ररथांचे प्रदर्शन केले जाणार आहे. महाराष्ट्राभर नावाजलेले बालनाट्य, बालकलावंतांचे सर्वोत्कृष्ट असलेले लोककलेचे कार्यक्रम तसेच विविध दिव्यांग संस्थांच्या बालकलावंतांचे नामांकित कार्यक्रम, गायन, वादन, नृत्य, एकपात्री, नाट्यछटा, जादूगार, बोलक्या बाहुल्यांचे खेळ, पपेट शो, नाटुकल्या, ग्रिप्स थिएटर आदी भरगच्च कार्यक्रम संमेलनात सादर होणार आहेत. कलादालनात चित्र, शिल्प, रांगोळी, हस्तकला, मुखवटे आदींचे प्रदर्शन व प्रशिक्षण ठेवण्यात येणार आहे.
