Chemist Strike – अखिल भारतीय केमिस्ट अँड ड्रगिस्ट असोसिएशनने पुकारलेल्या देशव्यापी बंदला पिंपरी-चिंचवड शहरातून उत्स्फूर्त प्रतिसाद मिळाला. पिंपरी-चिंचवड परिसरातील सर्व होलसेलर तसेच रिटेल औषध विक्रेते या संपात सहभागी झाले होते. संपूर्ण शहरातील औषध दुकाने बंद ठेवून संघटनेच्या आंदोलनाला भक्कम पाठिंबा देण्यात आला. हा बंद पूर्णपणे शांततेत, शिस्तबद्ध व लोकशाही मार्गाने पार पडला. कोणताही अनुचित प्रकार घडला नाही. औषध व्यवसायाशी संबंधित गंभीर प्रश्नांकडे शासनाचे लक्ष वेधण्यासाठी हा बंद पुकारण्यात आला होता. या आंदोलनाच्या माध्यमातून काही प्रमुख मागण्या करण्यात आल्या आहेत. बेकायदेशीर व अनियंत्रित ऑनलाइन औषध विक्री तात्काळ बंद करण्यात यावी. रुग्णांच्या आरोग्याशी थेट संबंध असलेल्या औषध विक्रीमध्ये फार्मासिस्टची भूमिका अत्यंत महत्त्वाची असून ऑनलाइन पद्धतीमुळे रुग्णांच्या सुरक्षिततेला धोका निर्माण होत आहे. ई-फार्मसी व ऑनलाइन कंपन्यांकडून डॉक्टरांच्या प्रिस्क्रिप्शनशिवाय, नियमबाह्य पद्धतीने औषध विक्री होत असल्याने त्यावर कठोर कारवाई करण्यात यावी. ड्रग्ज अँड कॉस्मेटिक्स अॅक्टचे काटेकोर पालन करण्यात यावे व औषध विक्री क्षेत्रातील नियमांचे उल्लंघन करणाऱ्यांवर तात्काळ कारवाई करण्यात यावी. औषध विक्रेत्यांवरील अन्यायकारक धोरणे मागे घेऊन लघु व मध्यम केमिस्ट व्यवसायांचे संरक्षण करण्यात यावे. रुग्णांना योग्य मार्गदर्शन, सुरक्षित औषध वितरण व प्रशिक्षित फार्मासिस्टची सेवा उपलब्ध राहावी यासाठी पारंपरिक औषध विक्री व्यवस्था मजबूत करण्यात यावी. पिंपरी-चिंचवडमधील सर्व केमिस्ट बांधवांनी एकजुटीने सहभाग नोंदवत संघटनेची ताकद दाखवून दिली. तसेच, फार्मासिस्ट व औषध विक्रेत्यांच्या न्याय्य मागण्यांसाठी महापौर फार्मासिस्ट रवि लांडगे यांनी समर्थन दर्शविले. “ऑनलाइन औषध विक्रीमुळे रुग्णांच्या सुरक्षिततेचा प्रश्न निर्माण होत असून, स्थानिक फार्मासिस्ट आणि जनऔषध सेवा धोक्यात येत आहे. औषध हे केवळ उत्पादन नसून तज्ज्ञ फार्मासिस्टच्या मार्गदर्शनाखाली दिली जाणारी आरोग्य सेवा आहे. त्यामुळे या मागण्या मान्य करण्यासाठी बंद पुकारण्यात आला आहे.” – विवेक मल्हारी तापकीर, उपाध्यक्ष , केमिस्ट असोसिएशन ऑफ पुणे डिस्ट्रिक्ट