PBKS vs LSG Cheerleaders Controversy Video : आयपीएल २०२६ मधील २३ मे रोजी झालेल्या अत्यंत महत्त्वाच्या सामन्यात पंजाब किंग्सने लखनौ सुपर जायंट्सचा ७ विकेट्सने धुव्वा उडवत प्ले-ऑफच्या आपल्या आशा जिवंत ठेवल्या. मात्र, या थरारक सामन्यादरम्यान मैदानाबाहेर एका अतिशय लाजिरवाण्या आणि अप्रिय घटनेने सर्वांचे लक्ष वेधून घेतले. मैदानावर दोन्ही संघ प्ले-ऑफच्या शर्यतीत टिकून राहण्यासाठी संघर्ष करत असतानाच, व्हीआयपी स्टँड्समध्ये उपस्थित असलेल्या प्रेक्षकांच्या एका गटाने सामन्याचे मनोरंजन करणाऱ्या चीअरलीडर्सशी गैरव्यवहार केल्याचा प्रकार घडला आहे. स्टेडियममधील धक्कादायक व्हिडिओ समोर; महिला पोलिसांचे कडक अॅक्शन! स्टेडियममधून समोर आलेल्या एका व्हिडीओनुसार, हा प्रकार लक्षात येताच तिथे तैनात असलेले सुरक्षा रक्षक आणि पोलीस अधिकारी तातडीने धावून आले. परिस्थिती हाताबाहेर जाऊ नये म्हणून विशेषतः महिला पोलिसांनी तात्काळ मोर्चा सांभाळला. महिला पोलीस कर्मचाऱ्यांनी हुल्लडबाजी करणाऱ्या त्या चाहत्यांना कडक शब्दात समज दिली आणि तात्काळ अॅक्शन घेत परिस्थिती नियंत्रणात आणली. या संतापजनक घटनेचा व्हिडीओ सोशल मीडियावर व्हायरल झाल्यानंतर क्रिकेट जगतातून हुल्लडबाजांवर कडक टीका होत आहे. During the LSG vs Punjab match at Lucknow’s Ekana Stadium, some fans were seen misbehaving with the cheerleaders and troubling them. Police then arrived and took action against those fans. Why do such things always happen in UP? pic.twitter.com/3iOQDnpc8Y — 𝐑𝐮𝐬𝐡𝐢𝐢𝐢⁴⁵ (@rushiii_12) May 23, 2026 श्रेयसचे ऐतिहासिक शतक अन् ६ पराभवांची मालिका खंडित! मैदानाच्या आत मात्र पंजाब किंग्सचा जलवा पाहायला मिळाला. श्रेयस अय्यरने कर्णधारपदाला साजेशी खेळी करत पंजाबच्या सलग ६ सामन्यांच्या पराभवाची मालिका खंडित केली. अय्यरने या सामन्यात त्याच्या आयपीएल कारकिर्दीतील पहिलेवहिले शानदार शतक ठोकले. विजयी षटकार मारून त्याने आपले शतक पूर्ण केले आणि पंजाबच्या विजयावर शिक्कामोर्तब केला. या ऐतिहासिक विजयानंतर श्रेयसने अत्यंत आक्रमक आणि दमदार अंदाजात आपले हेल्मेट हवेत भिरकावत विजयाचा जल्लोष साजरा केला. हेही वाचा – LSG vs PBKS : कॅप्टन श्रेयस अय्यरचं वादळी शतक! पंजाबने लखनौला त्यांच्याच घरात लोळवत प्ले-ऑफच्या शर्यतीत मारली मुसंडी पंजाबचे १५ गुण; पण प्ले-ऑफसाठी ‘या’ सामन्यावर अवलंबून राहावे लागणार भाग्य! या मोठ्या विजयानंतर पंजाब किंग्सच्या खात्यात १४ सामन्यांत १५ गुण झाले असून +०.३०९ च्या नेट रनरेटसह (NRR) ते गुणतालिकेत तात्पुरते चौथ्या स्थानावर पोहोचले आहेत. मात्र, तरीही पंजाबचे प्ले-ऑफचे तिकीट अद्याप अधिकृतपणे पक्के झालेले नाही. पंजाबच्या नशिबाचा खरा फैसला आज रविवारी मुंबईच्या वानखेडे स्टेडियमवर होणाऱ्या मुंबई इंडियन्स विरुद्ध राजस्थान रॉयल्स या सामन्यावर ठरणार आहे. १४ गुण असलेला राजस्थानचा संघ जर हा सामना जिंकला, तर ते १६ गुणांसह पंजाबला थेट पछाडून अव्वल ४ मध्ये जातील. पण, जर आधीच बाहेर झालेल्या मुंबईने राजस्थानला हरवले, तर पंजाबला कोलकाता नाईट रायडर्स आणि दिल्ली कॅपिटल्स यांच्यातील सामन्याच्या रनरेटच्या गणितावर अवलंबून राहावे लागेल.
