Chandrapur Food poisoning । चंद्रपूर जिल्ह्यातील साओली तालुक्यातील परडी येथील जिल्हा परिषद शाळेत बुधवारी जेवण केल्यानंतर शंभराहून अधिक विद्यार्थ्यांना अन्नातून विषबाधा झाल्याचा प्रकार उघडकीस आला आहे. या विद्यार्थ्यांना रात्रीपासून पोटदुखी व उलट्यांचा त्रास होऊ लागला.
गुरुवारी शाळेत आल्यानंतरही विद्यार्थ्यांची प्रकृती खालावत गेल्याने त्यांना ग्रामीण रुग्णालय व प्राथमिक आरोग्य केंद्रात दाखल करण्यात आले.
जिल्हा शल्यचिकित्सक डॉ. महादेव चिंचोले यांनी दिलेल्या माहितीनुसार, सध्या 62 विद्यार्थी मूल उपजिल्हा रुग्णालयात, 20 विद्यार्थी गडचिरोली जिल्हा रुग्णालयात, 17 विद्यार्थी साओली येथील रुग्णालयात, तर उर्वरित चंद्रपूर शासकीय वैद्यकीय महाविद्यालयात उपचार घेत आहेत. सर्व विद्यार्थ्यांची प्रकृती स्थिर असून, डॉक्टरांच्या देखरेखीखाली उपचार सुरू आहेत.
अन्न व औषध प्रशासनाची तपासणी सुरू | Chandrapur Food poisoning
घटनेच्या पार्श्वभूमीवर अन्न व औषध प्रशासन विभागाने शाळेतील अन्नाच्या नमुन्यांची तपासणी सुरू केली आहे. या तपासणीतून अन्न विषबाधेचे कारण स्पष्ट होण्याची शक्यता आहे.
मुनगंटीवारांकडून सखोल चौकशीची मागणी | Chandrapur Food poisoning
या घटनेची माहिती मिळताच वरिष्ठ भाजप नेते व आमदार सुधीर मुनगंटीवार यांनी विद्यार्थ्यांना सर्वोत्तम उपचार मिळण्यासाठी प्रशासनाला निर्देश दिले आहेत. त्यांनी या प्रकरणाची सखोल चौकशी करण्याची मागणीही केली आहे.
या घटनेने जिल्हा प्रशासनाचा भोंगळ कारभार पुन्हा एकदा चव्हाट्यावर आला असून शाळांमध्ये दिल्या जाणाऱ्या पोषण आहाराच्या गुणवत्तेवर पुन्हा एकदा प्रश्नचिन्ह उपस्थित झाले आहे.
