मॅंचेस्टर – सर्गियो अग्युरो, फेरन टोरेस व अल्विरो सेबेरन यांच्या गोलच्या जोरावर मॅंचेस्टर सिटी संघाने चॅम्पियन्स लीग फुटबॉल स्पर्धेत मार्सेलचा 3-0 असा सहज पराभव केला. या विजयासह त्यांनी या स्पर्धेतील गुणतालिकेत तिसरे स्थान मिळवले असून त्यांचा संघ युरोपा लीग स्पर्धेलाही पात्र ठरण्याच्या आशा वाढल्या आहेत.
टोरेसने सामन्याच्या 48 व्या मिनिटाला पहिला गोल केला. त्यानंतर अग्युरोने दुखापतीतून पूर्ण तंदुरुस्त ठरल्यानंतर या सामन्याद्वारे स्पर्धात्मक फुटबॉलमध्ये पुनरागमन केले. त्याचे पुनरागमन धडाकेबाज ठरले. त्याने या सामन्यात 77 व्या मिनिटाला संघाचा आणखी एक गोल केला व संघाला 2-0 अशी आघाडी मिळवून दिली. त्यानंतर अल्विरो सेबेरन याने सामना संपण्यापूर्वी 90 व्या मिनिटाला गोल केला व संघाला 3-0 असा मोठा विजय मिळवून दिला.
अन्य सामन्यात करिम बेन्झेमाने केलेल्या दोन गोलच्या जोरावर रेयाल माद्रीदने बोरुसिया मौनचेंगलाडबाख संघाचा 2-0 असा सहज पराभव केला. बेन्झेमाने पहिल्याच हाफमध्ये संघाचा विजय निश्‍चित करताना 9 व्या व 31 व्या मिनिटाला गोल केले.
उर्वरित खेळात त्यांना जरी त्यात वाढ करता आली नाही तरी त्यांनी बोरुसिया संघाचेही गोल करण्याचे सर्व प्रयत्न हाणून पाडले. या विजयांसह मॅंचेस्टर व रेयाल माद्रीद संघांची युरोपा लीगमधील पात्रता निश्‍चित होण्याची शक्‍यता वाढली आहे.
