Soren Grandson Death : झारखंडचे माजी मुख्यमंत्री चंपई सोरेन यांच्या २२ वर्षीय नातवाचा संशयास्पद मृत्यू झाल्याची धक्कादायक घटना समोर आली आहे. बंद खोलीत त्याचा मृतदेह आढळून आल्याने राजकीय वर्तुळात खळबळ उडाली आहे. पोलिसांनी या प्रकरणी तपास सुरू केला असून मृत्यूचे नेमके कारण अद्याप स्पष्ट झालेले नाही. मिळालेल्या माहितीनुसार, सोमवारी दुपारी वीर सोरेन याला बेशुद्ध अवस्थेत शासकीय रुग्णालयात आणण्यात आले. रुग्णालय प्रशासनाने दिलेल्या माहितीनंतर पोलिसांनी घटनास्थळी धाव घेत तपास सुरू केला. डॉक्टरांनी तपासल्यानंतर वीरला मृत घोषित केले. रुग्णालयात नेताना त्याच्या तोंडातून फेस येत असल्याचे सांगण्यात आले आहे. मित्रासोबत मनालीला सहल वीर सोरेन हा मित्र अग्नय वर्मासोबत २२ फेब्रुवारी रोजी मनालीला फिरण्यासाठी आला होता. दोघे स्थानिक होमस्टेमध्ये थांबले होते. २३ फेब्रुवारी रोजी त्यांनी सोलंग आणि सेथन परिसरात फिरून संध्याकाळी होमस्टेमध्ये परतल्याचे सांगण्यात आले. सोमवारी सकाळी वीरच्या डोक्यात दुखू लागल्याने त्याच्यासाठी ऑनलाइन औषध मागवण्यात आले. औषध घेतल्यानंतर दुपारी सुमारे २.३० वाजता त्याच्या खोलीतून मोठा आवाज आल्याचे मित्राने सांगितले. खोलीत जाऊन पाहिले असता वीर बेडवरून खाली पडलेला आढळला. तत्काळ त्याला रुग्णालयात नेण्यात आले. मात्र डॉक्टरांनी त्याला मृत घोषित केले. शवविच्छेदनानंतर स्पष्ट होणार कारण वीरच्या कुटुंबीयांच्या उपस्थितीत शवविच्छेदन करण्यात येणार असून त्यानंतरच मृत्यूचे नेमके कारण स्पष्ट होणार आहे. दरम्यान, पोलिसांनी आकस्मिक मृत्यूची नोंद करून सर्व बाजूंनी तपास सुरू केला आहे.