केंद्राचे मोठे मिशन! कोरोनाला रोखण्यासाठी ‘या’ तीन राज्यात पाठवल्या ५० ‘हाय हेल्थ टीम’

नवी दिल्ली : देशात दिवसेंदिवस कोरोनाच्या रुग्णसंख्येत विक्रमी वाढ होताना दिसत आहे. रविवारी एकाच दिवशी एक लाखापेक्षा जास्त रुग्णसंख्येची नोंदणी करण्यात आली होती. यामध्ये महाराष्ट्र, छत्तीसगड आणि पंजाब या तीन राज्यात कोरोनाने थैमान घालण्यास सुरुवात केली आहे. यावर नियंत्रण मिळवण्यासाठी आता केंद्र सरकारने पाऊले उचलायला सुरुवात केली असून या तीन राज्यांत सोमवारी 50 हाय लेव्हल हेल्थ टीम पाठवण्यात आल्या आहेत.

या प्रत्येक टीममध्ये दोन सदस्य असतील. त्यामध्ये एक इपिडर्मिटोलॉजिस्ट आणि एक आरोग्य तज्ज्ञाचा समावेश असेल. या टीम महाराष्ट्रातील 30 जिल्हे, छत्तीसगडमधील 11 जिल्हे आणि पंजाबमधील 9 जिल्ह्यातील स्थानिक आरोग्य व्यवस्थेशी समन्वय साधणार आहेत आणि त्यांना मार्गदर्शन करणार आहेत. तसेच कोरोना काळात घ्यावयाच्या खबरदारी, उपलब्ध सुविधा, टेस्टिंग आणि इतर गोष्टींबद्दलही मार्गदर्शन करणार आहेत.

सोमवारी सकाळची आकडेवारी लक्षात घेता महाराष्ट्रात 47,288, छत्तीसगडमध्ये 7,302 आणि पंजाबमध्ये 2,692 कोरोनाचे रुग्ण सापडले होते. देशातल्या एकूण नवीव रुग्णसंख्येपैकी अर्ध्या रुग्णसंख्येची भर ही एकट्या महाराष्ट्रातून पडत आहे.

देशातील कोरोनाचा उद्रेक पाहता पंतप्रधान नरेंद्र मोदी 8 एप्रिलला संध्याकाळी 6 वाजता राज्यांच्या मुख्यमंत्र्यांसोबत संवाद साधणार आहेत. रविवारी बोलताना पंतप्रधानांनी 5 फोल्ड स्ट्रॅटेजी म्हणजे टेस्टिंग, ट्रेसिंग, ट्रीटमेन्ट, गाईडलाइन्स नुसार वर्तन आणि लसीकरण या गोष्टींचे गंभीरपणे पालन केल्यास कोरोनाचे संकट नियंत्रणात येऊ शकेल असा विश्वास व्यक्त केला होता.

डिजिटल प्रभात आता टेलिग्रामवर! चॅनल जॉईन करा व मिळवा सर्व महत्वपूर्ण अपडेट्स, चॅनल जॉईन करण्यासाठी येथे क्लिक करा

Leave A Reply

Your email address will not be published.