पिंपरी – 91 वर्षांपासून निष्पक्ष आणि निर्भीड पत्रकारितेची परंपरा जोपासणाऱ्या दैनिक प्रभातच्या पिंपरी-चिंचवड विभागीय कार्यालयाचा वर्धापनदिन मोठ्या उत्साहात साजरा करण्यात आला. करोनाबाबतच्या सर्व नियमांचे पालन करत आयोजित करण्यात आलेल्या स्नेहमेळाव्यात प्रभातच्या वाचकांनी भरभरून प्रेम दिले.
चिंचवड येथील प्रा. रामकृष्ण मोरे प्रेक्षागृहाच्या प्रांगणात शुभेच्छांच्या वर्षावात प्रभातचा वर्धापनदिन मोठ्या उत्साहात आणि दिमाखात साजरा झाला. राजकीय, उद्योग, व्यापार, प्रशासकीय, शैक्षणिक, सामाजिक, सांस्कृतिक क्षेत्रातील मान्यवरांसह वकील, डॉक्‍टर, अभियंता, वृत्तपत्र विक्रेते यांनी आर्वजून भेट देत प्रभातला शुभेच्छा दिल्या.
तसेच डिजिटल प्रभातच्या माध्यमातून दैनिक प्रभातसोबत असलेले ऋणानुबंध शब्दांद्वारे व्यक्‍त केले. सायंकाळच्या आल्हाददायक आणि प्रसन्न वातावरणात दीपप्रज्वलनाने कार्यक्रमास सुरुवात झाली. दैनिक प्रभातचे व्यवस्थापकीय संचालक आनंद गांधी यांच्या उपस्थितीत पिंपरी-चिंचवड महापालिकेच्या स्थायी समितीचे अध्यक्ष ऍड. नितीन लांडगे, माजी महापौर योगेश बहल, ज्येष्ठ नगरसेविका सीमा सावळे, शिवसेना गटनेते राहुल कलाटे, नगरसेविका आशा शेंडगे, सारंग कामतेकर, पै. महाराष्ट्र केसरी दिलीप भरणे, कॉंग्रेस कमिटी अध्यक्ष गंगाराम मातेरे, कृषी उत्पन्न बाजार समितीचे दादाराम भांडेकर, पी के इंटरनॅशनल स्कूलचे जगन्नाथ काटे, रेस्टॉरंट ऍण्ड बार असोसिएशनचे अध्यक्ष पद्‌नाभन शेट्टी, पिंपरी-चिंचवड चेंबर ऑफ इंडस्ट्रीजचे उपाध्यक्ष आणि वसंत ग्रुप ऑफ इंडस्ट्रीजचे व्यवस्थापकीय संचालक प्रेमचंद मित्तल, चेंबरचे संचालक आणि कोहिनूर मार्बल्सचे व्यवस्थापकीय संचालक विनोद बन्सल यावेळी उपस्थित होते.
गुलाबी थंडीत गरमागरम मसाला दुधासोबत आनंदी आठवणींना उजाळा देणाऱ्या गप्पांची मैफल रंगविली. “प्रभात’चे आणि आपले वर्षानुवर्षांचे ऋणानुंबध या गप्पांमधून उलगडत होते. तसेच डिजिटल प्रभातच्या माध्यमातून शुभेच्छांसोबत आपल्या कार्याबाबत माहिती दिली. तसेच सद्यःस्थितीवर आपले विचार आणि अपेक्षाही व्यक्‍त केल्या. यावेळी दैनिक प्रभातचे सरव्यवस्थापक बी. एल. स्वामी, व्यवस्थापक रवी इंडी, जाहिरात व्यवस्थापक प्रवीण पारखी, एचआर व्यवस्थापक प्रवीण थुल आदी उपस्थित होते.
