मुंबई – बॉलिवूड अभिनेता सुशांत सिंह राजपूत याच्या आत्महत्या प्रकरणात केंद्रीय अन्वेषण ब्युरोने (CBI) आपला क्लोजर रिपोर्ट मुंबई न्यायालयात सादर केला आहे. १४ जून २०२० रोजी सुशांत आपल्या मुंबईतील वांद्रे येथील निवासस्थानी पंख्याला लटकलेल्या अवस्थेत आढळला होता. या प्रकरणात सुशांतच्या वडिलांनी त्याची माजी मैत्रीण रिया चक्रवर्तीवर आरोप केले होते, तर रियाने सुशांतच्या कुटुंबीयांवर प्रत्यारोप ठेवले होते. आता दोन्ही प्रकरणांमध्ये CBI ने क्लोजर रिपोर्ट दाखल केला आहे.
ऑगस्ट २०२० मध्ये तपास सुरू –
सुशांतच्या आत्महत्येने २०२० मध्ये मोठी खळबळ उडाली होती. या प्रकरणात अनेक बड्या व्यक्तींची नावे चर्चेत आली होती. कुटुंबीयांच्या मागणीनंतर CBI ने ऑगस्ट २०२० मध्ये तपास सुरू केला होता.
४ वर्षांनंतर रिपोर्ट –
चार वर्षांच्या तपासानंतर दाखल झालेल्या या क्लोजर रिपोर्टनुसार, रिया आणि तिच्या कुटुंबाला क्लीन चिट देण्यात आली आहे. सूत्रांच्या माहितीनुसार, CBI ला असा कोणताही पुरावा मिळाला नाही की, कोणी सुशांतला आत्महत्येसाठी भाग पाडले.
AIIMS च्या तज्ज्ञांचा सहभाग –
सुशांतच्या कुटुंबाकडे मुंबई न्यायालयात प्रोटेस्ट याचिका दाखल करण्याचा पर्याय आहे. CBI ने AIIMS च्या फॉरेन्सिक तज्ज्ञांकडून आत्महत्या आणि फाऊल प्लेची शक्यता तपासली होती. AIIMS च्या टीमने कोणत्याही फाऊल प्लेची शक्यता नाकारली होती.
सोशल मीडिया चॅट्सची चौकशी –
सुशांतच्या सोशल मीडिया चॅट्सची तपासणी MLAT द्वारे अमेरिकेत पाठवण्यात आली होती. या तपासात चॅट्समध्ये कोणतीही छेडछाड झाली नसल्याचे आढळले. रिया चक्रवर्ती ही सुशांतची माजी मैत्रीण असून, तिने स्वतः गृहमंत्री अमित शहा यांच्याकडे या प्रकरणाच्या चौकशीची मागणी केली होती.
SP नूपुर प्रसाद यांची मागणी –
तत्कालीन SP नूपुर प्रसाद (IPS) यांनी या प्रकरणात CBI चौकशीची मागणी केली होती. त्यानंतर CBI ने सखोल तपास केला आणि आता क्लोजर रिपोर्ट सादर करून सुशांतच्या आत्महत्येसाठी कोणीही जबाबदार नसल्याचे स्पष्ट केले आहे.
