Bullet Riders Terror : दिवे घाट तसेच पालखी महामार्ग बायपास परिसरात मध्यरात्रीच्या सुमारास कोयते हवेत फिरवत, बुलेट व इतर दुचाकींचे कर्णकर्कश आवाज करत दहशत माजविणाऱ्या 40 ते 50 अज्ञात बुलेटस्वार व दुचाकीस्वारांविरोधात सासवड पोलीस स्टेशनमध्ये गंभीर कलमान्वये गुन्हा दाखल केला आहे. या घटनेमुळे परिसरातील नागरिकांमध्ये भीतीचे वातावरण निर्माण झाले होते. याबाबत सासवड पोलीस स्टेशनचे पोलीस कॉन्स्टेबल सागर सावता कोरडे यांनी फिर्याद दिली आहे. (दि.13) मे रोजी रात्री 11 पासून ते 14 मे रोजी सकाळी 5 वाजेपर्यंत सासवड पोलीस स्टेशन हद्दीत पेट्रोलिंग सुरू होते. यावेळी दिवे घाट ते सासवड परिसरात गस्त घालत असताना पालखी महामार्ग बायपासवर व तक्रारवाडी येथील टोल नाक्यावर मोठ्या संख्येने बुलेटस्वार व इतर दुचाकीस्वार जमल्याची माहिती पोलिसांना मिळाली. संबंधित युवकांकडे कोयते असल्याची तसेच मोटारसायकलींच्या सायलन्सरमधून मोठमोठ्याने आवाज काढून दहशत निर्माण केली जात असल्याची माहिती मिळताच पोलीस घटनास्थळी पोहोचले. मात्र, पोलीस आल्याचे पाहून दुचाकीस्वारांनी भरधाव वेगाने अंधाराचा फायदा घेत घटनास्थळावरून पलायन केले. पोलिसांनी परिसरातील चहा व स्नॅक्स दुकानदारांकडे चौकशी केली असता, बुलेटस्वारांच्या दहशतीमुळे त्यांनी दुकाने बंद केल्याचे समोर आले. दरम्यान, घटनेचे काही व्हिडिओ सोशल मीडियावर व्हायरल झाले असून त्यामध्ये काही युवक कोयते हवेत फिरवत बुलेटचे कर्णकर्कश आवाज करत दिवे घाट परिसरात फिरताना दिसत आहेत. वाहतुकीचे नियम मोडून भरधाव वेगात दुचाकी चालवित असल्याचेही दिसून येत आहे. पोलिसांनी हेच युवक पालखी महामार्ग बायपास परिसरात जमलेल्या टोळीतील असल्याची खात्री व्यक्त केली आहे.