Plane Crash : दक्षिण अमेरिकेतील बोलिव्हिया देशात शुक्रवारी भीषण विमान अपघाताची घटना घडली. राजधानी ला पाज जवळील एल अल्टो शहरात बोलिव्हिया एअरफोर्सचे हरक्यूलिस C-130 हे लष्करी विमान लँडिंगदरम्यान घसरून थेट रस्त्यावर कोसळले. या भीषण दुर्घटनेत १५ जणांचा मृत्यू झाला असून सुमारे ३० जण गंभीर जखमी झाले आहेत. मिळालेल्या माहितीनुसार, संध्याकाळी सुमारे ६ वाजता ही दुर्घटना घडली. विमान धावपट्टीवर उतरतानाच नियंत्रण सुटल्याने ते रनवेवरून घसरले. एअरपोर्टच्या सीमारेषेची जाळी तोडून विमान रस्त्यावर जाऊन आदळले आणि तेथील अनेक वाहनांना जोरदार धडक दिली. धडकेची तीव्रता इतकी होती की वाहनांचे मोठ्या प्रमाणात नुकसान झाले. मृतांचा नेमका तपशील अद्याप स्पष्ट झालेला नसून ते विमानातील प्रवासी होते की रस्त्यावरच्या वाहनांतील, याची चौकशी सुरू आहे. दरम्यान, हे विमान देशाच्या विविध भागांत नव्या चलनाच्या नोटा पोहोचवण्यासाठी निघाले होते. अपघातानंतर मोठ्या प्रमाणात नोटा रस्त्यावर विखुरल्याचे दृश्य समोर आले असून घटनास्थळी उपस्थित नागरिकांनी त्याचे व्हिडिओ चित्रित केले. हे व्हिडिओ सोशल मीडियावर वेगाने व्हायरल होत आहेत. अपघातग्रस्त विमानाने यापूर्वी सांताक्रूझ शहरातून उड्डाण केले होते. स्थानिक अधिकाऱ्यांच्या माहितीनुसार, एल अल्टो येथे लँडिंग करताना ही दुर्घटना घडली. अपघातानंतर एल अल्टो आंतरराष्ट्रीय विमानतळ तात्पुरता बंद करण्यात आला आहे. तसेच राष्ट्रीय विमान कंपनी बोलिव्हियाना डी एव्हिएसिओन ने स्पष्ट केले आहे की हे विमान त्यांच्या ताफ्यातील नव्हते. या घटनेचा तपास सुरू असून अपघाताचे नेमके कारण अद्याप समोर आलेले नाही.