दिल्लीत मिठाईच्या दुकानाजवळ स्फोट; एक जण जखमी झाल्याची माहिती समोर
Delhi News | दिल्लीतील रोहिणी येथील प्रशांत विहार परिसरात स्फोट झाल्याची माहिती समोर आली आहे. या घटनेनंतर परिसरात एकच खळबळ उडाली आहे. दिल्ली पोलिसांचे पथक घटनास्थळी पोहोचले असून पोलिसांनी तपास सुरू केला आहे. स्फोट कशामुळे झाला याची माहिती घेतली जात आहे. या स्फोटात ऑटो चालक जखमी झाला आहे.
आज सकाळी 11.48 वाजता पोलिसांना प्रशांत विहार परिसरातून स्फोट झाल्याची माहिती मिळाली. माहिती मिळताच पोलीस आणि अग्निशमन दल घटनास्थळी दाखल झाले. मिठाईच्या दुकानाजवळ एका स्कूटरमध्ये मोठा स्फोट झाल्याचे प्राथमिक तपासात समोर आले आहे. यापूर्वी 20 ऑक्टोबरलाही प्रशांत विहार परिसरात सीआरपीएफ शाळेजवळही स्फोट झाला होता. स्फोटामुळे शाळेची भिंत, जवळपासची दुकाने आणि एका कारचे नुकसान झाले.
VIDEO | Explosion reported in Prashant Vihar area of #Delhi. Fire tenders reach the spot. More details awaited.
(Full video available on PTI Videos – https://t.co/n147TvrpG7) pic.twitter.com/Rchohvl1vY
— Press Trust of India (@PTI_News) November 28, 2024
मिळालेल्या माहितीनुसार, प्रशांत विहार परिसरात असलेल्या बन्सी मिठाईसमोर रस्त्यावरील विक्रेत्याजवळ पार्क केलेल्या स्कूटरमध्ये हा स्फोट झाला. घटनास्थळी पांढऱ्या पावडरसारखी वस्तू आढळून आली. पोलीस पथक घटनास्थळी हजर आहे. हा स्फोट कशामुळे झाला याचा शोध घेतला जात आहे. अद्याप कोणतीही जीवितहानी झाल्याचे वृत्त समोर आलेले नाही.
दरम्यान, या घटनेनंतर पोलिसांनी लोकांना शांतता राखण्याचे आणि अफवा पसरवू नका असे आवाहन केले आहे. तसेच येथील रस्त्यावर सापडलेल्या पांढऱ्या पावडरची तपासणी करण्यासाठी फॉरेन्सिक टीमला घटनास्थळी पाचारण करण्यात आले आहे. त्यानंतर पुढील चित्र स्पष्ट होईल.
