Saroj prajapat Death : भाजपच्या ज्येष्ठ नेत्या सरोज प्रजापती यांचे निधन झाल्याची दु:खद बातमी समोर आली आहे. गेल्या तीन दिवसांपासून त्या जयपूर येथील रुग्णालयात व्हेंटिलेटरवर उपचार घेत होत्या. आज उपचारादरम्यान त्यांची प्राणज्योत मालवली. मिळालेल्या माहितीनुसार, गुडघ्याच्या शस्त्रक्रियेसाठी त्यांना रुग्णालयात दाखल करण्यात आले होते. मात्र उपचारादरम्यान त्यांच्या शरीरातील साखरेचे प्रमाण अचानक वाढल्याने प्रकृती गंभीर बनली. त्यानंतर त्यांना ‘मंगलम’ रुग्णालयात हलवण्यात आले, पण उपचारादरम्यान त्यांचे निधन झाले. सरोज प्रजापती या मूळच्या डीडवाना येथील असून मागील काही काळापासून त्या नागौर येथे आपल्या कुटुंबासोबत राहत होत्या. त्यांच्या पश्चात पती, दोन मुले आणि दोन मुली असा परिवार आहे. 2019 साली त्यांनी भाजपच्या तिकिटावर लोकसभा निवडणूकही लढवली होती. त्यांच्या निधनाची बातमी कळताच भाजप कार्यकर्त्यांमध्ये शोककळा पसरली असून अनेक नेत्यांनी त्यांना श्रद्धांजली वाहिली आहे. भाजप राजस्थानचे प्रदेशाध्यक्ष मदन राठोड यांनी सोशल मीडियावर शोक व्यक्त करत म्हटले की, “सरोज प्रजापत यांचे निधन हे संघटनेचे कधीही भरून न येणारे नुकसान आहे. त्यांनी आयुष्यभर लोकसेवा आणि संघटन कार्यासाठी स्वतःला समर्पित केले.” त्यांच्या निधनामुळे भाजपमध्ये मोठी पोकळी निर्माण झाल्याची भावना व्यक्त केली जात असून राजकीय आणि सामाजिक क्षेत्रातूनही हळहळ व्यक्त केली जात आहे.
