नवी दिल्ली – उत्तरप्रदेशचे माजी मंत्री नकुल दुबे यांनी गुरूवारी कॉंग्रेस पक्षात प्रवेश केला. बसपच्या प्रमुख मायावती यांचे निकटवर्तीय आणि त्या पक्षाच्या प्रमुख ब्राह्मण चेहऱ्यांपैकी एक अशी दुबे यांची एकेकाळी ओळख होती.
दुबे यांनी काही दिवसांपूर्वी दिल्लीत कॉंग्रेसच्या उत्तरप्रदेश प्रभारी प्रियंका गांधी यांची भेट घेतली होती. तेव्हापासून त्यांच्या संभाव्य कॉंग्रेस प्रवेशाच्या चर्चा सुरू होत्या. अखेर त्यांनी अपेक्षेप्रमाणे कॉंग्रेसमध्ये प्रवेश केला.
उत्तरप्रदेशात 2007 मध्ये झालेल्या विधानसभा निवडणुकीत बाजी मारून बसपने सरकार स्थापन केले. बसपच्या त्या विजयात दुबे यांचे महत्वाचे योगदान असल्याचे मानले जाते. सध्या कॉंग्रेसची विविध निवडणुकांत पीछेहाट सुरू आहे. त्यातून अनेक नेते बाहेर पडत असल्याने कॉंग्रेसला गळती लागल्याचे चित्र आहे.
अशात दुबे यांचा प्रवेश त्या पक्षाच्या दृष्टीने महत्वाची घडामोड मानली जात आहे. भाजपचा एकमेव राजकीय पर्याय असल्याने कॉंग्रेसमध्ये प्रवेश केल्याची भूमिका दुबे यांनी मांडली. आता कॉंग्रेसकडून त्यांच्यावर महत्वाची जबाबदारी सोपवली जाण्याची शक्‍यता वर्तवली जात आहे.
