Big Decision: पंतप्रधान नरेंद्र मोदी (PM Narendra Modi) यांनी इंधन बचतीचे आवाहन केल्यानंतर दिल्ली सरकारने राजधानीत मोठे पाऊल उचलले आहे. मुख्यमंत्री रेखा गुप्ता (CM Rekha Gupta) यांनी सरकारी कार्यालयांमध्ये आठवड्यातून दोन दिवस ‘वर्क फ्रॉम होम’ लागू करण्याची घोषणा केली असून पुढील सहा महिन्यांसाठी नवीन वाहन खरेदीवर बंदी घालण्यात आली आहे. ‘मेरा भारत मेरा योगदान’ या नव्या योजनेअंतर्गत दिल्ली सरकारने प्रदूषण नियंत्रण आणि पेट्रोल-डिझेल बचतीसाठी ही उपाययोजना जाहीर केली. मुख्यमंत्री रेखा गुप्ता यांनी सांगितले की, सरकारी कर्मचाऱ्यांनी आठवड्यातून दोन दिवस घरातून काम केल्यास रस्त्यांवरील वाहनांची संख्या कमी होईल आणि त्यामुळे इंधन बचतीसह प्रदूषणातही घट होण्यास मदत होईल. कार्यालयांच्या वेळांमध्येही बदल – यासोबतच सरकारी कार्यालयांच्या वेळांमध्येही बदल करण्यात आला आहे. नव्या नियमानुसार दिल्ली सरकारची कार्यालये सकाळी १० ते सायंकाळी ७.३० या वेळेत सुरू राहतील, तर महापालिका कार्यालयांची वेळ सकाळी ८.३० ते सायंकाळी ५.३० अशी निश्चित करण्यात आली आहे. नो व्हेईकल डे – राजधानीतील नागरिकांनी ‘नो व्हेईकल डे’ पाळावा आणि सार्वजनिक वाहतुकीचा अधिक वापर करावा, असे आवाहनही सरकारने केले आहे. तसेच ग्रेड-१ ते ग्रेड-८ कर्मचाऱ्यांना सार्वजनिक वाहतूक वापरण्यास प्रोत्साहन देण्यासाठी अतिरिक्त १० टक्के भत्ता देण्याची घोषणा करण्यात आली आहे. मात्र, हा लाभ मिळवण्यासाठी प्रवास भत्त्याच्या किमान २५ टक्के रक्कम सार्वजनिक वाहतुकीवर खर्च करणे आवश्यक राहणार आहे. दरम्यान, दिल्ली सरकारने खासगी कंपन्यांनाही या मोहिमेत सहभागी होण्याचे आवाहन केले आहे. आठवड्यातून किमान दोन दिवस कर्मचाऱ्यांना घरातून काम करण्याची सुविधा द्यावी, अशी विनंती लवकरच कॉर्पोरेट क्षेत्राला केली जाणार असल्याचे मुख्यमंत्री गुप्ता यांनी स्पष्ट केले. पंतप्रधान मोदी यांनी मे २०२६ च्या दुसऱ्या आठवड्यात देशाला संबोधित करताना इंधन बचतीसाठी सार्वजनिक वाहतुकीचा वापर आणि ‘वर्क फ्रॉम होम’ला प्राधान्य देण्याचे आवाहन केले होते. त्यानंतर दिल्ली सरकारने या दिशेने पावले उचलत नवी मार्गदर्शक तत्त्वे लागू केली आहेत.