मध्यप्रदेश : आगामी लोकसभा निवडणुकांच्या पार्श्ववभूमीवर भाजपतर्फे आज मध्यप्रदेशातील ४ लोकसभा मतदारसंघांसाठी उमेदवारांची यादी जाहीर करण्यात आली आहे. भाजपद्वारे जाहीर करण्यात आलेल्या या ४ उमेदवारांच्या यादीमध्ये २००८ मालेगाव बॉम्बस्फोट प्रकरणातील आरोपी असलेल्या साध्वी प्रज्ञा सिंग ठाकूर यांचा देखील समावेश असून पक्षातर्फे त्यांना भोपाळ लोकसभा मतदारसंघातून उमेदवारी देण्यात आली आहे.
तत्पूर्वी, काँग्रेसतर्फे भोपाळ लोकसभा मतदारसंघातून आपले दिग्गज नेते दिग्विजय सिंह यांना उमेदवारी जाहीर करण्यात आली असून आता भाजपतर्फे साध्वी प्रज्ञा सिंग ठाकूर यांना उमेदवारी देण्यात आल्याने हा सामना अटीतटीचा ठरण्याची चिन्ह आहेत.
भोपाळ लोकसभा मतदारसंघातून 1984 मध्ये काँग्रेस उमेदवार शंकर दयाल शर्मा यांनी निवडणूक जिंकली होती त्यानंतर मात्र काँग्रेसला या जागेवरून आजतागायत विजय मिळवण्यात यश आलेले नाही.
दरम्यान, केंद्रामध्ये काँग्रेसचे सरकार असताना दिग्विजय सिंह हे हिंदू-दहशतवादाविरोधात प्रकर्षाने मतं मांडणारे नेते म्हणून ओळखले जात असत. अशातच आता दिग्विजय सिंह यांच्याविरोधात भाजपाद्वारे प्रखर हिंदुत्ववादी मतप्रवाहातील मानल्या जाणाऱ्या साध्वी प्रज्ञा सिंग ठाकूर यांना उमेदवारी देण्यात आल्याने प्रचार सभांमध्ये या दोन्ही उमेदवारांकडून कोणत्या मुद्द्यांवर मतं मागितली जातात हे पाहणे महत्वाचे ठरणार आहे.
न्यायालयाने २००८ मालेगाव बॉम्बस्फोट खटल्यात प्रमुख आरोपींपैकी एक असलेल्या साध्वी प्रज्ञा सिंग ठाकूर यांच्यावरील ‘मोक्का’ हटवला असला तरी अजूनही त्यांच्यावर बेकायदेशीर कृत्य प्रतिबंधक कायद्याअंतर्गत सुनावणी सुरु आहे. भाजपतर्फे साध्वी प्रज्ञा सिंग ठाकूर यांना देण्यात आलेल्या उमेदवारीचे समर्थन करण्यात आले असून भोपळाचे विद्यमान खासदार अलोक संजर यांनी याबाबत बोलताना सांगितले की, “काँग्रेस सरकारच्या काळात साध्वी प्रज्ञा सिंग ठाकूर यांचे नाव मालेगाव बॉम्बस्फोटांमध्ये गुंतविण्यात आले होते. मात्र आता काँग्रेसचा प्रभाव करून त्या अन्यायाचा बदला घेतला जाईल.”
BJP releases list of four candidates for #LokSabhaElections2019 in Madhya Pradesh; Sadhvi Pragya Singh Thakur to contest from Bhopal against Congress's Digvijaya Singh. pic.twitter.com/mSiSX8Xfsz
— ANI (@ANI) April 17, 2019
