Bhibhav Kumar । दिल्लीचे मुख्यमंत्री अरविंद केजरीवाल यांचे स्वीय्य सहाय्यक विभव कुमार यांनी आप खासदार स्वाती मालीवाल यांच्याविरोधात पोलिसांत तक्रार दाखल केली. मालीवाल यांनी 13 मे रोजी मुख्यमंत्र्यांच्या निवासस्थानाच्या सुरक्षेचा भंग केला. तसेच अनधिकृत प्रवेश करून तिथे गोंधळ घातल्याचा आरोप करत त्यांनी तक्रारीत केलाय. स्वाती मालीवाल मुख्यमंत्री केजरीवाल यांना त्यांच्या निवासस्थानी भेटायला गेल्या असताना विभव कुमार यांनी त्यांना मारहाण केल्याचा आरोप खोटा असल्याचे तक्रारीत म्हटलंय.
8:40 च्या सुमारास मुख्यमंत्र्यांच्या निवासस्थानी पोहोचलेल्या
तक्रारीत विभव कुमार यांनी, “स्वाती मालीवाल 13 मे रोजी सकाळी 8:40 च्या सुमारास मुख्यमंत्र्यांच्या निवासस्थानी पोहोचल्या होत्या. त्यावेळी मुख्यमंत्र्यांच्या निवासस्थानाच्या मुख्य प्रवेशद्वारावर उपस्थित असलेल्या सुरक्षा अधिकाऱ्याने त्यांना त्यांची ओळख विचारली. त्यावर मालीवाल यांनी सांगितलं की, त्या राज्यसभेच्या खासदार आहे. स्वाती मालीवाल म्हणाल्या की, मला आतमध्ये जाऊ द्यावं, माझी मुख्यमंत्र्यांसोबत अपॉइंटमेंट आहे. यानंतर स्वाती मालीवाल यांनी जबरदस्तीनं मुख्यमंत्र्यांच्या निवासस्थानी प्रवेश केला.
“वाट पाहायला सांगितल्यावर त्या आरडाओरडा” Bhibhav Kumar ।
विभव कुमार यांनी तक्रारीत पुढे म्हटलं आहे की, मुख्यमंत्र्यांच्या ऑफिसच्या कर्मचाऱ्यांनी खासदार स्वाती मालीवाल यांना वेटिंग एरियामध्ये थांबण्यास सांगितलं. हा वेटिंग एरिया मुख्यमंत्री निवास संकुलातच आहे. पण, मुख्यमंत्री राहत असलेल्या मुख्य इमारतीत नाही. मालीवाल यांना मुख्यमंत्री निवासाच्या मुख्य इमारतीबाहेर थांबण्यास सांगितल्यानंतर त्यांनी आरडाओरडा सुरू केला. तसेच, मुख्यमंत्र्यांच्या कार्यालयातील कर्मचाऱ्यांसाठी अपशब्दही वापरले. 9 वाजण्याच्या सुमारास सीएम ऑफिसच्या कर्मचाऱ्यांनी जोरदार आक्षेप घेतल्यानंतरही त्या वेटिंग एरिया सोडून मुख्यमंत्र्यांच्या निवासस्थानाच्या मुख्य इमारतीत पोहोचल्या.
“तुम्हारी औकात क्या है?…” Bhibhav Kumar ।
विभव कुमार यांनी दाखल केलेल्या तक्रारीत, “सकाळी 9.22 च्या सुमारास तक्रारदार (विभव कुमार) मुख्यमंत्र्यांच्या निवासस्थानाच्या मुख्य इमारतीत पोहोचले, जिथे त्यांना स्वाती मालीवाल ड्रॉईंग रूममध्ये बसलेल्या दिसल्या. तक्रारदार त्यांच्याकडे गेले आणि त्यांची विनम्रपणे विचारपूस केली. तसेच, त्यानंतर विभव कुमार यांनी स्वाती मालीवाल यांना मुख्यमंत्र्यांची भेट घेण्यासाठी योग्य प्रक्रिया अवलंबण्याचं आवाहन केलं. यावर स्वाती मालीवाल आरडाओरडा करू लागल्या. तसेच, त्यांनी अपशब्द उच्चारण्यास सुरुवात केली. स्वाती मालीवाल म्हणाल्या की, “तुम्हारी हिम्मत कैसे हुई…एक एमपी को रोकेन की…तुम्हारी औकात क्या है?” असे म्हणत आरडाओरडा केला.
