Rat Bite : पंडित भीमसेन जोशी रुग्णालयात अतिशय धक्कादायक घटना समोर आली आहे. आयसीयूमध्ये उपचार घेत असताना उंदराने चावलेल्या ८९ वर्षीय महिला रुग्णाचा मृत्यू झाल्याने रुग्णालय प्रशासनावर गंभीर प्रश्नचिन्ह उपस्थित झाले आहे. या घटनेनंतर नातेवाईकांनी तसेच मनसेने तीव्र संताप व्यक्त करत दोषींवर कारवाईची मागणी केली आहे. मिळालेल्या माहितीनुसार, सुहासिनी माठेकर (वय ८९) यांना १२ मार्च रोजी रुग्णालयात दाखल करण्यात आले होते. त्यांच्या प्रकृती गंभीर असल्याने त्यांच्यावर अतिदक्षता विभागात उपचार सुरू होते. मात्र उपचारादरम्यान सोमवारी सायंकाळी सुमारे ५ वाजता त्यांचा मृत्यू झाला. नातेवाईकांच्या आरोपानुसार, आयसीयूमध्ये असताना रात्री उंदराने त्यांच्या हाताला चावा घेतला होता. या घटनेत त्या गंभीर जखमी झाल्या होत्या. सकाळी सुमारे ६ वाजता नातेवाईक रुग्णाला भेटण्यासाठी गेले असता हा प्रकार त्यांच्या निदर्शनास आला. त्यावेळी उंदीर तिथून पळून गेल्याचे सांगितले जात आहे. या घटनेनंतर रुग्णालयातील स्वच्छता आणि सुरक्षिततेबाबत गंभीर प्रश्न उपस्थित झाले आहेत. आयसीयूसारख्या अतिदक्षता विभागात उंदरांचा वावर कसा, असा सवाल नागरिकांकडून उपस्थित केला जात आहे. नातेवाईकांनी रुग्णालयातील कर्मचाऱ्यांच्या हलगर्जीपणामुळेच हा प्रकार घडल्याचा आरोप केला आहे. दरम्यान, मनसेने या घटनेवर आक्रमक भूमिका घेत संबंधित डॉक्टरांवर तत्काळ कारवाई करून त्यांना निलंबित करण्याची मागणी केली आहे. पुढील २४ तासांत कारवाई झाली नाही तर तीव्र आंदोलन छेडण्याचा इशाराही मनसेने दिला आहे. या घटनेमुळे मिरा-भाईंदर परिसरात संतापाचे वातावरण असून रुग्णालय प्रशासनाकडून याबाबत चौकशी सुरू करण्यात आली आहे.