Women IPL 2023 – भारताची जगप्रसिद्ध असलेली इंडियन प्रीमियर लीग (आयपीएल) स्पर्धा यंदाच्या वर्षात कधी खेळवली जाणार याबाबत लाखो क्रिकेट चाहत्यांच्या मनात उत्सुकता आहे. त्याअगोदर बीसीसीआयने चाहत्यांसाठी एक मोठी बातमी दिली आहे. मागील बऱ्याच काळापासून फक्त चर्चेत असलेली महिला आयपीएल स्पर्धा आता सुरु होणार आहे. बीसीसीआयने या स्पर्धेला यशस्वी बनविण्यासाठी कंबर कसली आहे. काही दिवसांपूर्वीच या महिला आयपीएल स्पर्धेच्या ‘मीडिया राईट्स’चा (प्रसारण हक्क) लिलाव करण्यात आला. यामध्ये वायकॉम १८ने बाजी मारली आणि पुढील पाच वर्षांसाठी अवघ्या ९५१ कोटी रुपयांची सर्वाधिक बोली लावली.
पुरुषांच्या आयपीएल स्पर्धेत संघाच्या प्लेइंग इलेव्हनमध्ये केवळ चार परदेशी खेळाडूंचाच समावेश करता येतो असा नियम आहे. मात्र, आता बीसीसीआयने महिला आयपीएलसाठी नवीन नियम बनवला आहे. क्रिकबझच्या अहवालानुसार, महिला आयपीएल संघाच्या प्लेइंग इलेव्हनमध्ये पाच परदेशी खेळाडू सहभागी होऊ शकतील, परंतु यामध्ये एक खेळाडू हा संलग्न देशाचाअसायला हवा. क्रिकबझशी बोलताना एका सूत्राने सांगितले की, “महिला आयपीएलच्या सामन्यांसाठी आता पाच विदेशी खेळाडू मैदानात उतरतील, मात्र यामध्ये पाचवा खेळाडू हा संलग्न देशाचाच असेल.”
मिळालेल्या माहितीनुसार, बीसीसीआयने महिला आयपीएल २०२३ च्या लिलावासाठी प्रत्येक फ्रँचायझीचे पर्स मूल्य १२ कोटी रुपये एवढे ठरवले आहे. या पैशांमध्ये दरवर्षी (पुढील पाच वर्षांसाठी) दीड कोटींची वाढ होणार आहे. ही वाढ पाच वर्षांसाठी असून शेवटच्या वर्षापर्यंत प्रत्येक फ्रँचायझीचे मूल्य हे १८ कोटींपर्यंत वाढेल.
ही आयपीएल स्पर्धा महिला क्रिकेटसाठी एक मोठी झेप मानली जात आहे. महत्वाचं म्हणजे, २५ जानेवारीला बीसीसीआयकडून स्पर्धेतील फ्रँचायझीच्या मालकांची घोषणा केली जाणार आहे. यामध्ये एकूण 30 कंपन्यांनी सहभाग नोंदवला आहे. त्याचबरोबर पुरुष आयपीएलच्या एकूण १० फ्रँचायझींचाही यामध्ये समावेश आहे. या बोलीत सहभागी होण्याची शेवटची तारीख २३ जानेवारी आहे तर २५ तारखेला बीसीसीआय विजेत्या कंपन्यांची घोषणा करेल.
