Baramati Election 2026 : बारामती पोटनिवडणुकीसाठी काँग्रेसने आपला उमेदवार जाहीर केला असून आकाश मोरे यांना अधिकृत उमेदवारी देण्यात आली आहे. ते सोमवारी उमेदवारी अर्ज दाखल करणार आहेत. ही निवडणूक बिनविरोध व्हावी यासाठी प्रयत्न सुरू होते, मात्र त्यात यश आले नाही. काँग्रेसने या निवडणुकीत ‘धनगर कार्ड’ खेळत सुनेत्रा पवार यांच्या विरोधात आकाश मोरे यांना मैदानात उतरवले आहे. या घोषणेनंतर महाविकास आघाडीतील शरद पवार यांच्या राष्ट्रवादी काँग्रेस आणि उद्धव ठाकरे यांच्या शिवसेनेची पुढील भूमिका काय असेल, याकडे सर्वांचे लक्ष लागले आहे. उमेदवारी जाहीर झाल्यानंतर आकाश मोरे यांनी प्रतिक्रिया देताना, “लोकशाही टिकवण्यासाठी आम्ही निवडणूक लढवत आहोत. आमचा मुख्य राजकीय विरोधक भाजप आहे,” असे सांगितले. तसेच, बारामतीतील विविध प्रश्नांवर आवाज उठवण्यासाठी ही निवडणूक लढवत असल्याचे त्यांनी स्पष्ट केले. अजित पवार यांच्या अपघाताच्या तपासाचा मुद्दाही त्यांनी उपस्थित केला असून, त्या प्रकरणात गुन्हा दाखल झाल्यास उमेदवारी मागे घेण्याची तयारी असल्याचेही ते म्हणाले. कोण आहेत आकाश मोरे? आकाश मोरे हे व्यवसायाने वकील असून त्यांचे वडील विजय मोरे हे माजी आमदार होते. त्यांनी 2014 साली विधानसभा निवडणूक लढवली होती. काँग्रेसच्या विचारसरणीशी त्यांचा जुना संबंध आहे. दरम्यान, बारामती ही अजित पवार यांचा बालेकिल्ला मानली जाते. ही पोटनिवडणूक बिनविरोध व्हावी यासाठी राष्ट्रवादीकडून प्रयत्न झाले होते. यासाठी राहुल गांधी यांची भेट घेण्याचीही तयारी दर्शवण्यात आली होती, तसेच सुनेत्रा पवार यांनी काँग्रेसचे प्रदेशाध्यक्ष हर्षवर्धन सपकाळ यांच्याशी दूरध्वनीवर चर्चा केली होती. मात्र, काँग्रेसने अखेर या जागेसाठी उमेदवार उभा केला आहे.