कॅरारा – ऑस्ट्रेलिया महिला संघाने दुसऱ्या टी 20 सामन्यात भारतावर 4 गडी राखून तीन सामन्यांच्या मालिकेत 1-0 अशी आघाडी घेतली आहे. भारतीय महिला क्रिकेट संघाने प्रथम फलंदाजी करत 9 बाद 118 धावा केल्या. प्रत्युत्तरात ऑस्ट्रेलियाच्या ताहिला मॅक्ग्रथने केलेल्या नाबाद 42 धावांच्या मदतीने 19.1 षटकात 6 बाद 119 धावा करत विजय मिळविला. या मालिकेतील अखेरचा आणि निर्णायक सामना उद्या होणार आहे.
निर्धारित धावांचा पाठलाग करताना एलिसा हिली आणि बेथ मुनी ही जोडी मैदानात उतरली. मात्र, पहिल्या षटकाच्या दुसऱ्या चेंडूवर एलिसा हिलीचा शिखा पांडेने त्रिफळा उडवला. त्यानंतर बेथ मुनी आणि मेग लेनिंगने डाव सावरला.
दुसऱ्या विकेटसाठी दोघीनी 31 धावांची भागीदारी केली. मेग लेनिंगला राजेश्वरी गायकवाडने तंबूचा रस्ता दाखवला. त्यानंतर एश गार्डनर आणि एलिस पेरी झटपट बाद झाल्या. तर बेथ मुनीला बाद करत राजेश्वरीने तीन विकेट्स घेतल्या. यानंतर दडपणात आलेल्या ताहिला मॅक्ग्रथ आणि जॉर्जिया वारहमने विजय मिळवून दिला. ताहिलाने 33 चेंडूत 6 चौकार खेचत नाबाद 42 धावांची निर्णायक खेळी केली.
तत्पूर्वी, प्रथम फलंदाजी करताना भारताच्या सुरुवात निराशाजनक ठरली. सलामीवीर स्मृती मंधाना, शेफाली वर्मा आणि जेमिमा रॉड्रिग्स या जास्त वेळ मैदानात तग धरू शकल्या नाहीत. यामुळे भारताची 3 बाद 24 अशी अवस्था झाली. यानंतर कर्णधार हरमनप्रीत कौरने डाव सावरला. तिने 20 चेंडूत 28 धावांची खेळी केली.
मात्र, वारहमच्या गोलंदाजीवर हिलीने तिला यष्टीचित केले. पाठोपाठ यास्तिक भाटियादेखील धावबाद झाली. यानंतर पूजा वस्त्राकार एकाकी झुंज देत 26 चेंडूत नाबाद 37 धावा करत संघाला 118 धावांचा टप्पा गाठून दिला.
संक्षिप्त धावफलक –
भारत – 20 षटकात 9 बाद 118 (हरमनप्रीत कौर 28, दिप्ती शर्मा 16, पूजा वस्त्राकार नाबाद 37. सोफी मोलिनेक्स 2-11, तायला व्लामिन्की 2-18) ऑस्ट्रेलिया – 19.1 षटकात 6 बाद 119 (बेथ मुनी 34, मेग लेनिंग 15, ताहिला मॅक्ग्रथ नाबाद 42, जॉजिया वारहम नाबाद 10. राजेश्वरी गायकवाड 3-21)