परभणी : सध्या राज्यात महायुतीचे सरकार आहे. महायुतीमध्ये राष्ट्रवादी काँग्रेस आल्यावर शिवसेना आमदार आणि पदाधिकारी नाराज झाले होते. अजित पवार यांच्या राष्ट्रवादी काँग्रेसकडून निधी दिला जात नसल्याची तक्रार पदाधिकाऱ्यांकडून केली जात होती. आता परभणीमधून एक धक्कादायक घटना समोर आली आहे.
काय आहे संपूर्ण प्रकरण?
मुख्यमंत्री एकनाथ शिंदे यांच्या पक्षाच्या पदाधिकाऱ्यांने निधी मिळत नसल्याने जिल्हा अधिकारी कार्यालयात आत्महत्येचा प्रयत्न केला. ज्ञानोबा व्हावळे या व्यक्तीने विष प्राशन करून आत्महत्येचा प्रयत्न केला. ते माजी जिल्हा परिषद सदस्य आहेत. यावेळी पोलिसांनी वेळीच हस्तक्षेप केल्यामुळे पुढील अनर्थ टळला आहे.
राष्ट्रवादी काँग्रेसचे नेते आणि परभणीचे पालकमंत्री संजय बनसोडे यांच्या अध्यक्षतेखाली जिल्हा नियोजन समितीची सभा झाली. नियोजन समितीतून निधी मिळत नसल्याने ज्ञानोबा व्हावळे यांनी जिल्हा जिल्हाधिकारी कार्यालयावर विष प्राशन करण्याचा प्रयत्न केला. दरम्यान, पोलिसांच्या सतर्कमुळे पुढील अनर्थ टळला. मात्र मुख्यमंत्री एकनाथ शिंदे यांच्याच पक्षाच्या जिल्हा नियोजन समितीच्या सदस्याने निधीसाठी आत्महत्या करण्याचा प्रयत्न केल्याने महायुतीमधील धुसफूस समोर येताना दिसत आहे.
